Olimpiya terma jamoamizning Frantsiyadagi o‘yini bekor qilindi

Parij-2024 yozgi Olimpiya o‘yinlariga tayyorgarlik ko‘rayotgan futbol bo‘yicha O‘zbekiston olimpiya terma jamoasi bugun Gvineya olimpiyachilariga qarshi o‘rtoqlik uchrashuvini o‘tkazishi rejalashtirilgan edi.

"O‘zbekiston futbol assotsiatsiyasining ma’lum qilishicha, Gvineya jamoasi mazkur o‘yinda ishtirok eta olmasligini bildirgan. O‘FA qisqa fursat ichida mazkur o‘rtoqlik o‘yini uchun boshqa raqib topish ustida ish olib bordi. Unga ko‘ra, Timur Kapadze qo‘l ostidagi jamoa bugun Fransiyaning "Reysing Grass" klubiga qarshi maydonga tushadigan bo‘ldi", - deyiladi Milliy Olimpiya qo‘mitasi bergan xabarda.

Eslatib o‘tamiz, Timur Kapadze boshchiligidagi terma jamoamiz Parij Olimpiadasi guruh bosqich dastlabki uchrashuvini 24 iyul kuni Ispaniya terma jamoasiga qarshi o‘tkazadi.