“Олтин тўп” соҳиби Родри аслида энг зўр футболчи кимлигини айтди

2024 йилги “Олтин тўп” соҳиби Родри жаҳон футболида энг зўр ўйинчи сифатида кимни тан олишини айтиб ўтди.

- Дунёнинг энг зўр ўйинчиси ким экани ҳақида менда умуман шубҳа йўқ, бу Лионель Месси. Криштиану Роналду эса, туғма истеъдод соҳиби бўлмаса-да, меҳнат эвазига Месси билан тенглаша олди. Лекин фақатгина уларга қарши ўйнаганлар уларнинг фарқини билади.

Биз Криштиану Роналду жарима майдончамизга киришини истамасдик, чунки бу ўта хавфли. Месси эса, ҳар доим жарима майдончасига ёриб кириб, бизга катта муаммо туғдирарди.

Мессининг тўпни олгани хавф-хатардан далолат берарди. Мен унга қарши ўйнаганимда тўпни олиб қўйишга ҳаракат қилардим, бироқ у доим “қочиб” кетарди, - деди Родри.

Родри “Манчестер Сити”га келгунга қадар Испания чемпионатида тўп тепган. Лионель Месси Родри эгалик қилаётган “Олтин тўп” совринини саккиз маротаба қўлга киритган. Роналду нуфузли совринга беш бор лойиқ кўрилган.