Ўруновни расмий ўйинларда кутинглар!
Россия премьер-лигаси жамоалари чемпионатнинг иккинчи қисмига тайёргарлик олиб бормоқда. Остон Ўрунов “Уфа” футболчилари билан бирга қишки ўқув-машғулот йиғинларини Туркиянинг Белек шаҳрида ўтамоқда.
Бошқирдистонликлар бу йиғинда 23 январгача шуғулланади.
Россия нашрлари “Уфа” клуби бош директори Шамиль Газизовга боғланиб, жароҳат олган Остон Ўруновнинг аҳволи билан қизиқди.
Эслатиб ўтамиз, Остон Ўрунов Россия чемпионатининг 16-турида ўзининг трансфер ҳуқуқига эгалик қилувчи “Спартак” билан ўйинда жароҳат олиб, майдонни эрта тарк этганди.
Қисқа суҳбат қуйидагича кўриниш олди:
- Ўрунов кўринмай қолди?
- Энг муҳими, майдонда кўриниш бериш. У кузда жароҳат олганди. Шунақаси ҳам бўлиб туради. Биз вазият яхши томонга ўзшаришига умид қиламиз. Уни расмий учрашувларда кўрасизлар.
- У чемпионат қайта тикланганидан кейин сафга қайтадими?
- Албатта. Ҳали бу борада кўпроқ ишлаш керак.
Дарҳақиқат, “Уфа” клуби Туркиядаги дастлабки ўртоқлик учрашувида Венгриянинг “Пакш” жамоаси билан ўртоқлик учрашувида майдонга тушди. Венгрияликларнинг 2:0 ҳисобидаги ғалабаси билан якунланган беллашувда Остон Ўрунов иштирок этмади.
Жароҳатидан тикланишга уринаётган ҳамюртимиз асосан жисмоний тайёргарликни кучайтиришга қаратилган машқларни бажармоқда.
“Уфа” Туркиядаги иккинчи назорат учрашувини 23 январь куни Россиянинг “Оренбург” жамоасига қарши ўтказиб, шу билан биринчи хорижий ўқув-машғулот йиғинини якунлайди.
21 ёшли Остон Ўрунов мамлакатимизнинг энг истеъдодли ўйинчиларидан ҳисобланади. 2020 йилнинг бошида Россия премьер-лигасига кўчиб ўтган ҳамюртимизнинг легионер сифатидаги фаолияти жуда яхши бошланган эди.
Ярим мавсум давомида “Уфа” таркибида муваффақиятли ўйнаган Ўруновни 2020 йилнинг ёзида “Спартак” трансфер қилиб, беш йиллик шартнома берганди. Табиийки, ўзбек футболчисига таклифлар кўплигига қарамай, Шамиль Газизов уни ўзи билан “Спартак”га олиб кетганди.
Кейинчалик Газизов ва “Спартак” хўжайини Леонид Федун ўртасидаги келиб чиққан келишмовчиликлар оқибатида Остон Ўруновнинг Москва клубидаги фаолияти ҳам катта сўроқ остида қолди.
Мана орадан бир ярим йил вақт ўтган бўлса-да, бу масала ҳали ечимини топгани йўқ. Орадан “Уфа”да ижарада ўйнаб, яна “Спартак”га қайтган ҳамюртимизни москваликлар яна ўйнатгани йўқ. Натижада “Уфа”дан қўним топган Шамиль Газизов ўз футболчисига айланиб қолган Остон Ўруновни мавсум бошида “Спартак”дан бир мавсумга ижарага олди.
Уфаликларда ёзда Остонни бир миллион еврога тўлиқ трансфер қилиш ҳуқуқи бор. Бунинг учун жамоа премьер-лигадаги ўрнини сақлаб қолиши керак. Ҳозирча, “Уфа” 18 та учрашувда 16 очко жамғариб, хавфли зона – 17-поғонада бормоқда.
Шамиль Газизов агар “Уфа” қуйи лигага тушиб кетса, жамоа тарқатиб юборилиши мумкинлиги ҳақида огоҳлантирган.
Остон Ўрунов жароҳатлар туфайли жуда кам ўйнамоқда. Жорий мавсумда ҳамюртимиз атиги еттита учрашувда қатнашиб, голли вазиятларда бевосита иштирок этгани йўқ.
“Уфа” қишки танаффусдан кейинги илк учрашувини 27 январь куни сафарда “Ахмат” клубига қарши ўтказади.
Фикрлар