Осиё жамоалари кушандаси Венесуэла қандай жамоа? Рақибни имкониятларини таҳлил қиламиз!

Фернандо Батиста бошқарувидаги Венесуэла терма жамоаси бугун Ўзбекистон миллий термаси билан куч синашади. Хўш, таркибда кимлар бор? Жамоанинг ўйин услуби қандай? Ўртоқлик баҳсидаги «крепкий» рақибимиз ҳақида сиз билишингиз керак бўлган барчаси! Матн катталашиб кетмаслиги учун, қисқа ва лўнда қиламиз.

Таркибда кимлар бор?

Бир қарашда, ярқ этиб кўзга ташланадиган ижрочилар йўқдек туюлиши мумкин, аммо (Трансфермаркт) жамоанинг умумий трансфер қиймати 37 миллион еврога тенг. Бу бизникидан сезиларли даражада яхшироқ кўрсатгич. Номлар бобидаги камчиликни бир нечта яхши савиядаги, клубида асосий футболчилари саналган йигитлар бемалол тўлдириб юборади. МЛСни ёндираётган Хосеф Мартинес бугунги Венесуэланинг асосий форвардларидан бири бўлиб турибди.

Девид Бекхэмга тегишли бўлган «Интер Маями» аъзоси бир неча мавсумлардан бери Европанинг савияли клубларидан тушаётган таклифларни рад этаётганидан хабарингиз бор. Соломон Рандон барчангизга яхши таниш.

АПЛ дан тортиб, РПЛгача кезган йигит айни дамда «Ривер Плейт»ни асосий таркиб аъзоси. Шунингдек, Италия футболида суяги қотган Томас Ринкон ҳам алоҳида мавзу.

«Ювентус» билан яқин ўтмишда Италия чемпионати ва кубогида зафар қучган йигит ҳозир «Сампдориа»нинг етакчиларидан бири. Айниқса, «Атлетико Минейро»дан, «Реал Солт - Лейк - Сити»га кўчиб ўтган Жефферсон Саварино ҳам Океан ортида ўзини аъло даражада кўрсатаётганлардан бири.

Умуман олганда, Венесуэла термаси Жанубий Американинг чинакам «чақилмас ёнғоқ» жамоасига айланиб улгурган.

Ўйин услуби қандай?

Тактик схема борасида бизникидан фарқ қилади, аммо стратегия жуда ўхшаш. Рондон ва Мартинес калибридаги форвардлари бор Венесуэла ҳужум чизиғида бу форвардларнинг ажойиб баланс ҳосил қилиши учун замин яратган. Рондон бироз орқароқда жойлашган холда, тезкор Мартинесни бош зонага очилиши учун замин яратса, Мартинес қарши ҳужумлар чоғида Рондонни сўнгги зарбага олиб чиқувчи паслар билан таъминлашга уринади. Олдинги чизиқдаги иккита марказий ҳужумчи борлиги учун ҳам, Венесуэланинг қанот ҳимоячилари камдан кам холларда катта куч билан олдинга ўтиши мумкин. Қанот ярим ҳимоячилари кўпинча ҳужумда олдинга силжиши мумкин, аммо ўта ҳужумкорликни улардан кутилмайди. Рақиб, асосан иккинчи рақамда ҳаракат қилишни ҳуш кўрувчи ўйин моделини ўзлаштирган.

Футболчиларнинг рақами рандом тарзда танланган

Яъни, тўпни рақибга берган холда, тезкор қарши ҳужумлар, марказдаги кучли прессинг ва олдинги чизиқдаги йигитларнинг классига суянган узатмалар. Тактик томондан биздан фарқ қилсада, ўйин стратегияси деярли ўхшаш. Батиста шогирдлари ўзининг сўнгги ўйинида Саудия Арабистони устидан 1:2 ҳисобида зафар қучди. Ўйинни томоша қилар экансиз, Эрве Ренарнинг очиқ футболи учун жанубий америкаликлар биринчи бўлимдаёқ икки бор қарши ҳужумда жазолаганига гувоҳ бўлишингиз мумкин. Кейин, Саудия ўртадаги фарқни қисқартирди, аммо қолган дақиқаларда штурм қилганига қарамай, мағлубиятдан қутулиб қолгани йўқ. Жамоа анча тартибли ҳимояланибгина қолмай, тўпни керакли паллада назорат остига олишни ҳам уддалай олади.

Венесуэланинг сўнгги ўйинлардаги натижаси қандай?

Бугунги рақибларимиз сўнгги бешта ўйинида худди биз сингари 3 ғалаба, 1 дуранг ва бир бор мағлуб бўлган. Эътиборлиси, сўнгги ўйинлардаги барча ғалабалар қитъадошларимиз устидан қозонилган. Жамоа Сурия, Саудия Арабистони ва БААни таслим этган. Панама билан 2:2 жанговар дуранг қайд этган бўлса, Исландия билан баҳсда минимал ҳисобда мағлубиятга учради.

Бизда эса, бироз бошқачароқ вазият. Камерун, Қозоғистон ва Боливиядан устун келган бўлсак, Россия билан дурангга имзо чекдик. Коста-Рика билан баҳснинг сўнгги дақиқаларидаги эътиборсизлик сабабли аламли мағлубият.

Бу баҳсдан нима кутишимиз мумкин?

Бир қарашда, йиғиндаги энг муҳим ўйиндек кўриниши мумкин, бироқ Сречко Катанец катта эҳтимол билан аралаш таркиб билан ўйинни бошласа керак. Бу ўртоқлик ўйини эканлиги биринчи планда бўлади. Ишқибозлар қанчалар истамасин, словениялик мутахассис ташқи босимга тайёр эканлигини кўрсатиб бўлди. У қайсар, принципларга содиқ қолишда давом этади. Ҳа, Элдор асосий таркибда, ҳа Машарипов ҳам тушар, аммо бошқа позицияларда кутилмаган ўзгаришлар бўлиши аниқ.

Бошқача схема, янгича тактика ва бошқа «янгиликлар» синаб кўрилмайди. Ҳозирга қадар ўрганилган нарсалар мустаҳкамланади. Тамом. Терма жамоа ва клубдаги футбол ўртасидаги фарқ тобора ортиб бораётган замонда бу нормал ҳолат. Сиз бир мавсум давомида 50-60 ўйинда иштирок этиш учун камида 5-6 хил версияга эга бўлишингиз шарт. Йилига максимум 10 та катта учрашув ( Максимум) бўладиган ўтказиш имкони бор жамоа билан нимадир ўйлаб топишга интилиш, таваккал қилиш Катанецнинг фалсафасига зид. Нима ҳам дердик, бу мураббийнинг танлови. 

Яҳёхўжа Улуғхўжаев