Осиё кубоги. 3-тур учрашувлари ўз ниҳоясига етди

Осиё кубогининг гуруҳ босқич учрашувлари ўз ниҳоясига етди. 3-турдан ўрин олган баҳслардан сўнг плей-оффга йўл олган жамоалар номи маълум бўлди. Қуйида барча гуруҳлардаги якуний жадвал билан танишишингиз мумкин. 

"A" гуруҳ

Қатар Хитой устидан минимал ҳисобда зафар қучиб, 100 фоизлик натижа билан гуруҳдан чиқди. Баҳсдаги ягона голни эса 66-дақиқада Ҳайдос киритди. Параллел учрашувда бўлса қўшниларимиз Ливанни 2:1 ҳисобида таслим қилди. Дастлаб, Жради жамоасини олдинга олиб чиққан бўлса, 80-дақиқада Умарбоев имкониятларни тенглаштирди. 90+2 дақиқада эса Ҳамрокулов ғалаба голини уриб кетди. Шу тариқа, Тожикистон иккинчи ўрин билан плей-офф масаласини ҳал қилди. 

"B" гуруҳ

Сурия Ҳиндистонни 1:0 ҳисобида мағлуб қилиб, ўз тарихида илк бор плей-оффга йўл олди. 76-дақиқада Ҳарбин учрашувдаги ягона голни уриб, жамоасини 3 очкони тақдим этди ва энг яхши 3-ўринлар қаторига кирди. Ўзбекистон Австралия билан дуранг ўйнади. Биринчи тайм сўнггида ҳакам дарвозамиз томон пенальти белгилади ва Бойл 11 метрлик жаримадан аниқ фойдаланди. 78-дақиқада эса Турғунбоев боши билан гол уриб, ҳисобни тенглаштириб қўйди. 5 очко билан Катанец шогирдлари иккинчи ўринни қўлга киритди. 

"C" гуруҳ

Эрон 3-турда БАА устидан зафар қучиб, 9 очкони қўлга киритди. Танташев бошқариб борган ўйинда Тареми дубль қилди, Ғассани 90+3 дақиқада жавоб қайтарди. Фаластин Гонгконгни йирик ҳисобда ғалаба қозонди. Даббанг икки бора, Қунбар эса бир марта ўз ҳисобига гол ёздириб қўйди. 

"D" гуруҳ

Сўнгги турда энг кўп гол ушбу гуруҳдаги ўйинларда киритилди. Ироқ Вьетнам дарвозасини 3 марта гол урган бўлса, номинал меҳмонлар 2 бора жавоб қайтарди. Япония Индонезияни қийинчиликсиз таслим қилди. Уэда дубль қилиб, орадаги фарқни иккитага ошириб қўйди, 88-дақиқада Ҳубнер ўз дарвозасини ишғол қилиб қўйди. Шундан сўнг индонезияликлар таркибидан Валш битта гол урди. 

"E" гуруҳ

Иордания Баҳрайнга мағлуб бўлди. 34-дақиқада Маденнинг узатмасидан сўнг Ҳелал ҳисобни очди. Нариги учрашувда Жанубий Корея Малайзия билан дуранг ўйнади. Сўнгги дақиқаларда урилган голлар эвазига томонлар бир очкодан бўлишиб олди. 

"F" гуруҳ

Қирғиз Республикаси сўнгги турда бир очко олишга муваффақ бўлди. Ўмон дастлаб ҳисобни очган бўлса, 80-дақиқада Кожо имкониятларни тенглаштириб қўйди. Ушбу гол туфайли ўмонликлар плей-оффдан қуруқ қолди. Саудия Арабистони  сўнгги турда очко йўқотди. Таиланд билан бўлиб ўтган баҳсда дарвозалар ишғол қилинмади. 

Шу тариқа плей-оффга қуйидаги жамоалар йўл олди:

Тожикистон - БАА

Ироқ - Иордания

Австралия - Индонезия

Саудия Арабистони - Жанубий Корея

Эрон - Сурия

Баҳрайн - Япония

Қатар - Фаластин

Ўзбекистон - Таиланд