Осиёлик футболчилар яна мағлуб бўлди

2026 йилги жаҳон чемпионатида иштирок этадиган Ироқ терма жамоаси мундиал олдидан Венесуэла футболчиларига қарши ўртоқлик учрашувида майдонга тушди.

Беллашув АҚШнинг Иллинойс штатида жойлашган Бриджвью шаҳридаги "Ситгик Стэдиум" аренасида бўлиб ўтди. Учрашувда Венесуэла терма жамоаси рақиб дарвозасини икки бор ишғол этиб, 2:0 ҳисобида ишончли ғалабага эришди. Голлар 17-дақиқада Кристиан Кассерес ва иккинчи бўлим бошланиши биланоқ, 46-дақиқада Жезус Рамирес томонидан урилди.

Ироқ таркибида эса учрашувнинг 72-дақиқасида Али Юсиф тўғридан-тўғри кўрсатилган қизил карточкадан сўнг майдонни тарк этди ва жамоа қолган вақтни бир футболчи камликда ўтказишга мажбур бўлди.

Қайд этиш жоизки, Ироқ 2026 йили ўтказиладиган жаҳон чемпионати иштирокчилари қаторига кирган. Мусобақа 11 июндан 19 июлга қадар АҚШ, Мексика ва Канада ҳудудларида ташкил этилади. Қуръа натижаларига кўра, Ироқ терма жамоаси "I" гуруҳдан жой олди ва у ерда Франция, Сенегал ҳамда Норвегияга қарши майдонга тушади. Венесуэла терма жамоаси эса саралаш босқичидан муваффақиятли ўта олмаган ва жаҳон чемпионати йўлланмасини қўлга киритмаган.