Осиёнинг энг яхши ёш футболчиси бўлган Файзуллаев Европанинг жиддий клубига ўтади!

30 октябрь, 08:30
3
Футбол

Ўзбекистон миллий терма жамоаси ва ЦСКА клуби вакили Аббосбек Файзуллаев Осиё футбол конфедерация томонидан қитъанинг энг яхши ёш футболичиси сифатида эътироф этилди.

Маҳаллий ва хорижий экспертлар 21 ёшли футболчининг халқаро миқёсдаги муваффақиятига муносабат билдиришда давом этмоқда.

Sports.uz портали ўзбекистонлик футбол ишқибозлари эътиборига Аббобек Файзуллаев ҳақидаги фикр-мулоҳазаларни ҳавола қилишда давом этади.

Жаъфар Ирисметов, Ўзбекистон миллий терма жамоаси собиқ ҳужумчиси:

Аббос ҳақли равишда Оисёнинг энг яхши футболчиси бўлди. Мен ана шу фикрдаман, чунки Файзуллаев Олимпия ўйинларига биринчи маротаба йўлланма олган Ўзбекистон U-23 терма жамоаси муваффақиятларига катта ҳисса қўшди.

Ҳозир эса, миллий терма жамоада ҳам, ЦСКАда ҳам жуда сифатли футбол намойиш қилмоқда. Бир сўз билан айтганда, у ҳақли равишда нуфузли соврин билан тақдирлади.

Ўйлашимча, тез орада, яъни қишда Файзуллаев бошқа чемпионатга ўтиши мумкин.

Кирилл Брейдо, ЦСКА клуби коммуникациялар бўйича дректори:

Аббос мана шундай жиддий совринни қўлга киритганидан жуда хурсандмиз. Бу бутун қитъанинг эътирофи. Файзуллаев бу совринга ҳам ЦСКА, ҳам терма жамоадаги ўйинлари туфайли лойиқ кўрилди.

Шуни таъкидлаш керакки, Аббос жуда камтар, оддий ва меҳнаткаш йигит. Ҳеч қандай юлдузлик касали йўқ, фақат меҳнат қилади!

Яқинда Аббос клуб офисига ош олиб келиб, барча ходимларни меҳмон қилди. Шунинг учун ҳам, клубимизнинг ҳар бир вакили уни нуфузли соврин билан чин дилдан қутлайди, десам, муболаға бўлмайди. Бунақа бирдамлик ЦСКАда доим қадрлаб келинган ва бу жуда муҳим.

Аббосбек жамоамизда ўсишда давом этишига, олдинда уни янада юқори даражадаги совринлар кутаётганига умид қиламиз.

Эдуард Мор, Москванинг “Спартак” клуби собиқ футболчиси:

Аббосбек Файзуллаев — жуда яхши даражадаги ва салоҳияти юқори футболчи. Ихчамгина, лекин курашни самарали олиб бориш усулларини яхши билади. Ноодатий ҳаракат қила олади, ҳар доим ўйинни кучайтиради, майдон марказида ўйинни яхш ривожлантиришга уста.

Нуфузли совринни унга ҳақли равишда беришди. Чунки айнан Аббосбек туфайли ЦСКАнинг олдинги чизиқдаги ишлари юришяпти. Мен Файзуллаев ёзда Европанинг “топ-5” лигаларидаги жиддий клубга ўтади, деб ҳисоблайман.