Отабек Ғуломхўжаев: Агар раҳбарият ишингиздан қониқмаяпмиз деса, истеъфога чиқишга тайёрман, лекин...

“Андижон” клуби Ўзбекистон кубоги доирасида Нукусда “Арал Самали” меҳмони бўлди ва учрашув 1:1 ҳисобида якунланди. Ўтган сафар эса, ўз уйида “Локомотив”га ютқазганди. Ҳа, ҳозирча жамоанинг чемпионатда ва кубокдаги ишлари кўнгилдагидек эмас. Суперлигада ҳозирча 5 та ўйин ўтказган “Андижон” 1 та ғалаба, 1 та дуранг ва 3 та мағлубиятга учраган. Мухлислар эса натижалардан хурсанд эмас.

Устига-устак бугун бўлиб ўтган “Арал” – “Андижон” ўйинида меҳмонлар бош мураббийи Отабек Ғуломхўжаев иштирок этгани йўқ. Жамоани унинг ёрдамчилари олиб кетган, таркиб ҳам тўлиқ эмас. Ғуломхўжаев эса “Локомотив” – “Турон” учрашувида стадионда кўриниш берган. Дастлаб, шу масала юзасидан мураббийга мурожаат қилганимизда сабабини қуйидагича тушунтирди.

- Биласизми, соғлигимда бироз бетоблик бор эди. Одатда, ҳар йилнинг бошида Тошкентда текширтирардим. Ўша муддат келиб қолганди. Бу ҳақида раҳбариятни ҳам огоҳлантириб қўйгандим. “Арал” билан учрашувга асосан ўйин амалиётига етарлича эга бўлмаётган футболчиларни юбордик. Куннинг биринчи ярмида шифокорларнинг кўригидан ўтганимдан сўнг, тушликдан кейин “Локомотив” – “Турон” ўйинига бордим. Чунки кубокдаги кейинги рақибимиз “Турон” эди. Ушбу учрашувни кўриш учун вақтим бўлди. Агар бу ўйин вақтлироқ бошланганида бора олмасдим. “Андижон” эса “Арал” билан ўйинга мураббийсиз кетгани йўқ. Жамоани яхши билган инсон олиб кетди, - деди бош мураббий.

Нима бўлганда ҳам мухлислар “Андижон”дан ғалаба кутишганди. Про-лига жамоаси билан қайд этилган дуранг борасида Ғуломхўжаев қандай муносабатда бўлди? Умуман, жамоа асосий эътиборини кубокдан кўра, Суперлигага қаратяптими?

- Ҳали “Арал” – “Андижон” ўйинини кўрмадим, - дея мавзуни давом эттирди бош мураббий. - Кўрганимдан кейин фикр билдиришим мумкин. Ёрдамчи мураббийимнинг айтишича, бутун ўйинни назорат қилдик. Ўзимиз имкониятлардан фойдалана олмаганмиз. Айрим пала-партиш ҳолатлар кузатилган. Асосан ўйин амалиёти кам бўлган футболчиларда шу нарса сезилган. Етакчиларимизни асрадик. Чунки сунъий майдонда Пламен Димов, Дониёр Абдуманнопов каби йигитларимиз қишда жароҳат олган. Масалан, Дониёр ўшанда икки ҳафтага сафдан чиққанди. Сунъий майдон эса эски жароҳатларни қўзғайди. Олдимизда чемпионатда керакли ўйинларимиз турибди. Албатта, кубокда қанча кўп узоққа борсак шунча яхши. Захирадаги футболчиларга ҳам бу яхшигина ўйин амалиётига эга бўлиши учун туртки бўлади. Шунингдек, “Арал”га қарши учрашувда айрим ёшларимиз ўзларидан яхши таассурот қолдирганликларини айтишяпти. Кимлар ўзини кўрсатган бўлса, “Турон”га қарши учрашувда ҳам имконият берамиз. Мени ўйинга бормаганлигимнинг сабабини юқорида айтиб ўтдим. Умуман олганда, футболчиларимизнинг кайфияти зўр. “Турон” билан ўйин орқали “Қўқон-1912”га тайёргарлик кўрамиз.

Яна бир асосий масала шундан иборатки, охирги пайтларда салбий натижалар туфайли Отабек Ғуломхўжаевнинг истеъфога чиқиши мумкинлиги ҳақида ҳам мухлислар орасида турли гап-сўзлар юрибди. “Андижон” раҳбарияти у билан ҳамкорликни тўхтатиш ниятидами ёки имконият бериляптими?  

- Агар раҳбарият ишингиздан қониқмаяпмиз деса, истеъфога чиқишга тайёрман. Лекин раҳбарият билан гаплашиб олганмиз. Биз ҳозирги пайтда ўйинни шакллантириш устидамиз. Жамоамиз ёш, ўзимизнинг услубни йўлга қўйишга ҳаракат қиляпмиз. “Металлург” билан ҳам, “Локомотив” билан ҳам учрашувларда иккинчи рақам остида ўйнаганимиз йўқ. Имкониятлар яратяпмиз, фақат гол ура олмаяпмиз. Агар вазиятлардан биринчи бўлиб фойдаланишни билсак, бошқача бўлади. Голлар уришни кўпайтирсак, исталган клубга бош оғриқ бўламиз. Бу янги жамоа ва йиллар керак. Раҳбарият кутишга тайёр. Биринчи даврадан кейин яна гаплашамиз. Агар жамоамиз ўйин услубини яхши ўзлаштириб олса, у ёғи яхши кетади. Бизда ўйин бор, аммо натижа йўқ. Яна қайтараман, мабодо, раҳбарият ишимдан қониқмаётганини айтса, муаммо йўқ. Лекин ҳали бу тўғрисида гап-сўз бўлгани йўқ, - деди Ғуломхўжаев.