Отабек Ғуломхўжаев иштирокида матбуот анжумани! Эдгар Бернхардт нега Андижонда қолди?

“Металлург” – “Андижон” (2:0) ўртасидаги учрашувдан кейин меҳмонлар бош мураббийи Отабек Ғуломхўжаев мағлубият сабабларини қуйидагича изоҳлади:

- Ўйинни кўрдинглар, кескин курашларга бой бўлди. Айниқса, биринчи бўлим. Бир қатор голли вазиятларни яратдик. Фақат ҳар доимгидек имкониятлардан фойдалана олмаяпмиз. Иккинчи бўлимда биринчи голни ўтказиб юборганимиздан кейин кимнидир айбламоқчи эмасман. Биз бу вазиятни кўриб чиқамиз. Биринчи голдан сўнг, яна ҳужум қилдик ва ҳимояни эсдан чиқариб қўйдик. Балки жамоамиздаги бир қатор футболчиларимиз ёшига нисбатан ҳам тажрибасизлиги панд бергандир. Икки хил бўлимлар бўлди. Хатоларни ўрганиб чиқамиз ва “Металлург”ни ғалаба билан табриклаймиз.

- Бугун Жасур Жалолиддинов билан Мартин Боаке ўртасидаги боғламлар унчалик ўхшамади...

- Жасур иккала қанотдаги футболчиларимизни тўп билан таъминлаб турди. Биринчи бўлимда нечта вазият бўлди? “Металлург”да битта, бизда тўртта имконият юзага келди. Агар гол урсак, бошқача ҳисоб бўлиши мумкин эди. Мартин ҳозирча жамоага мослашиб кета олмаяпти. Охири уни захирага ҳам олдик. Балки кейинги учрашувларда уни бошқача позицияда синаб кўрармиз ёки захирамиздаги иқтидорли ҳужумчилардан фойдаланармиз.

- “Машъал” билан ўйиндан кейин Эдгар Бернхардт ҳақида фикр билдиргандингиз, билишимча у бугун Бекободга ҳам келмаган...

- Уни ҳозирги пайтда оилавий муаммолари бор. У билан гаплашганимизда шу ҳақида айтди ва хаёли кўпроқ оиласи билан боғлиқ. Шунинг учун унга дам бериб, Андижонда қолдирдик.

Матнда хатолик топсангиз, ўша хатони белгилаб, бизга жўнатинг (Ctrl + Enter)