Ўттиз миллион фунт! “Сити” ҳимоячига нарх белгилади

2025 йилда “Манчестер Сити” билан янги шартнома имзолаганидан кейин Рико Льюис Пеп Гвардиола жамоасида иккинчи даражали ўйинчига айланиб қолди.

Англия терма жамоаси футболчиси 2022-2023 йилги мавсумда, жамоа требл қўлга киритган пайтда, “Манчестер Сити” асосий таркибига кириб келган эди.

Ўтган ёзда “Ноттингем Форест” Рико Льюисни катта маош билан ўзига оғдириб олмоқчи бўлган пайтда иқтидорли ҳимоячи Манчестерда қолиш вариантини танлади ва янги шартномага имзо чекди.

Янги хабарларга кўра, “Манчестер Сити” Рико Льюис бўйича муносиб таклиф тушса, ҳимоячининг ёзда клубни тарк этишига рухсат беради.

21 ёшли футболчи бу мавсум ўйин вақти билан муаммоларга дуч келди ва 2025 йил сентябрида 2030 йилгача мўлжалланган узоқ муддатли шартнома имзолаган бўлса-да, бугунги кунда жамоада асосий фигура эмас.

“Шаҳарликлар” ҳимоянинг ўнг қанотида Матеуш Нуньешга, ярим ҳимояда Нико О'Райлига рақобатни бой берган Рико Льюисни 30 миллион фунт эвазига сотишга тайёр.

Спорт директори Угу Виана ёзда трансфер бозорида фаоллик кўрсатмоқчи. Бир неча кириш-чиқиш трансферлари бўлиши кутиляпти. Жамоани Рико Льюисдан ташқари Жеймс Траффорд, Нико Гонсалес, Умар Мармуш ва Савио каби етарлича ўйин амалиётига эга бўлмаётган футболчилар тарк этиши мумкин.