O‘z Andrea Pirlosi bor, bizga noqulay va xavfli Iroq termasining kuchi nimada? Raqibni birga tahlil qilamiz!

Xabaringiz bor, 11 iyun sanasida O‘zbekiston U23 terma jamoasi yurtimizda o‘tayotgan qit’a birinchiligi doirasidagi chorak final o‘yinida ishtirok etadi. Timur Kapadze boshchiligidagi futbolchilarimizga iroqlik tengqurlari raqiblik qiladi. Xo‘sh, pley-offdagi raqibimizning o‘yin uslubi qanday? Qaysi aspektlarda kuchli?

O‘yin uslubi

Biz uchun hech qanday syurpriz yo‘q, klassik 4-2-3-1. Shunga qaramay, Iroq yoshlari to‘psiz harakat qilish bobidagi mehnatkashligi bois bu sxemadan maksimal naf chiqarishga o‘rgangan. Jamoa pozitsion hujumga o‘tgan chog‘da tayanch yarim himoyachilari ham oldinroqqa chiqib, hujumni qo‘llashi, qanot himoyachilari yanada erkinroq bo‘lishi mumkin. Himoyalanayotganda esa, hatto 9-raqamdagi markaziy hujumchi ham ortga qaytib, sheriklariga yordam berishga urinadi.

Miroslav Soukup tartibli va yig‘iq jamoa tuza olgan. Iroq futbolida doim birinchi planga jismoniy tayyorgarlik ko‘tarilganini inobatga olsak, pley-offdagi raqibimiz biz uchun anchagina noqulaylik tug‘dirishi mumkin. 2 ta tayanch yarim himoyachisi istalgan paytda qarshi hujum boshlash imkoniga ega. Uzoq masofaga yuqoridan uzatmalar amalga oshirishi yoki markazning katta qismini to‘p bilan bosib o‘tib, zarba nuqtasiga qadar chiqishi mumkin. Qanotdagi yarim himoyachilar esa, raqibning imkoniyatidan kelib chiqib o‘z joyini almashtiradi. Masalan, Avstraliya bilan o‘yinda qizil kartochkaga qadar ular ortga chekingan bo‘lsa, Quvayt bilan to‘qnashuvda deyarli vinger sifatida o‘ynadi. Umuman olganda, 4-2-3-1 transformatsiya uchun eng qulay sxema ekanligi yana bir bor o‘z isbotini topmoqda.

Iroq U23 erta pressing qo‘llamaydi, aksincha, 90 daqiqa davomida to‘liq "svejiy" bo‘lishi uchun kerakli pallalardagina o‘yin tempini oshiradi. Hisob ularni qanoatlantirsa, yakkakurashlar va mayda follar yordamida o‘yin tempini tushirib oladi. Shuningdek, Miroslav Soukup shogirdlari to‘psiz harakat qilishda ham musobaqadagi eng kuchli jamoalardan biri desak, adashmagan bo‘lamiz. Hujumda ham, himoyada ham deyarli barcha futbolchi ishtirok etadi.

Jamoa mudofaa chog‘ida jarima maydonchasi ichida zich joylashib olsa, hujumga o‘tganda butun maydon bo‘ylab keng o‘ynaydi. E’tiborlisi shundaki, guruh bosqichidagi birorta bahsda iroqlik futbolchilar o‘z hududiga ulgurmaganini ko‘rganim yo‘q. Umid qilamanki, biznikilar bu borada birinchi bo‘ladi.

Eng xavfli futbolchilari kimlar?

Muntader Muhammad

Muntader bu jamoaning yuragi! U hujumlarni boshlab beradi. Standartlarni ijro etadi hamda tayanch zonasida mehnat qiladi. Chinakam etakchi va universal futbolchi. Qahramonimiz guruhdagi 3 o‘yinda ham foydali ish koeffitsienti bo‘yicha eng yaxshi ochko jamg‘arib turibdi. Iordaniya bilan bahsda assist, Quvayt darvozasiga kiritilgan gol o‘z yo‘liga, Avstraliyaga qarshi kechgan juda og‘ir bellashuvda aynan Muntader Muhammad maydon markazidagi ustunlikni ta’minlab bergan edi. Asosan tartib ustiga qurilgan jamoalarda kreativ yigitlar darrov ko‘zga tashlanishi tabiiy. Muhammad tablodagi hisobdan kelib chiqib, istalgan pozitsiyani kuchaytirishi mumkin. Hujumchi ortida, qanot yarim himoyasi, markaz bilan orqa chiziq o‘rtasidagi ko‘prik va boshqalar. Shuningdek, u birinchi uzatmani amalga oshirishda ham benazir. U juda ham zich o‘ynaydigan Iroqning o‘ziga xos Andrea Pirlosi desak, adashmagan bo‘lamiz. Ancha orqada to‘p tepishiga qaramay, istalgan vaziyatda bitta pas bilan tezkor jamoadoshlarini hujumga boshlashi mumkin. Umuman olganda, u bugungi Iroq U23 safidagi eng xavfli futbolchi!

Ramazon Juma

Jamoa sardori va nominal hujumchi. 9-raqamda harakat qilsa-da, Ramazon deyarli butun maydon bo‘ylab o‘ynaydi. Jamoasi to‘psiz qolib ketsa, ortga qaytishi va pressingda ishtirok etishi mumkin. U klassik markaziy hujumchi emas! Ba’zan markazgacha kelib, qanot yarim himoyachilarini o‘yinga qo‘shish uchun "aldamchi to‘qqizlik" vazifasini ham bajarib beradi. Dribling ustasi emas, biroq birga-bir vaziyatda istalgan himoyachini dog‘da qoldirishga qodir. Markaziy himoyachilarimiz uni 90 daqiqa davomida e’tibordan qochirmasligi shart.

Darovzabon - Ahmad Hasan

O‘zbekiston U23 jamoasi futbolchilari uchun chinakam bosh og‘rig‘i bo‘lishi mumkin bo‘lgan 3-futbolchi bilan tanishing. U - darvozabon Ahmad Hasan! 22-raqamdagi bu jingalak soch yigit Iroqning guruh bosqichidagi omadli ishtiroki uchun eng katta hissa qo‘shganlardan biri hisoblanadi.

Uning uzoq masofadan beriladigan zarbalarga reaktsiyasi tahsinga sazovor. Shuningdek, oyoq bilan ham yaxshi o‘ynay oladi. To‘pga chiqishda ham biror marotaba hatoga yo‘l qo‘yganini turnir davomida ko‘rmadim. Umuman olganda, qarshi hujumga suyanadigan jamoaning darvozboni g‘alabaning 90 foiz mehnatini qilishi zamonaviy futbolda odat tusiga kirb bo‘ldi. Shunchaki, ularning seyvlari e’tiborimizdan chetda qolib ketadi.

Ojiz nuqtasi qaer?

Birinchi navbatda, ikkita o‘rta bo‘yli markaziy himoyachilarni ko‘rsatish mumkin. Ular har doim ham bir chiziqda harakat qilishni uddalay olmagani bois, ko‘pincha sun’iy ofsayd hosil qilishda xatoga yo‘l qo‘yadi. Bundan tashqari, ikkinchi qavatdagi uzatmalarda ham pozitsiyasini boy berishi ehtimoli yuqori. Iroq pozitsion himoyalanganda kuchli bo‘lishi mumkin, ammo aynan mudofaa markazi eng ojiz nuqta sanaladi. Shu bois, Miroslav Soukup ularni yolg‘iz qoldirmaslik va raqib hujumga o‘tganda, barcha ortga qaytishini talab qiladi. Shuningdek, zaxira o‘rindig‘i ancha tor. Asosiy ijrochilar maydondagi yigitlar bo‘lib, murabbiy boshqa futbolchilarni o‘yinga qo‘shish orqali bahs kartinasini o‘zgartirib yuborishi imkonsiz. Agar Kapadze shogirdlari o‘yinning asosiy vaqtida raqibni o‘z ritmga moslab olsa, Iroq zaxiradan o‘yinga qo‘shilganlar yordamida voqealar rivojini o‘zgartirib yuborishining imkoni juda past. Ya’ni, raqibimizning barcha asosiy kuchi ilk daqiqalardan yashil maydonda bo‘ladi.

Temur Kapadze esa, istalgan vaqtda o‘yinning borishi va tezligini o‘zgartirishi mumkin. E’tiborlisi, bizda raqibdan farqli o‘laroq, ikkita sxema 100 foiz o‘zlashtirilgan. Bu hujumkor 4-3-3 va ehtiyotkor 4-2-3-1! Yodingizda bo‘lsa, Kapadze Eron bilan o‘yinda aynan shu hiylani ishga solgan va to‘pni raqibga topshirib, ikkinchi raqamda harakat qilgan edi. Bu safar ham vakillarimiz ilk daqiqalardan hujumga tashlanmay, pastroq tempda o‘yin boshlashi ehtimoli yuqori. Barchasi Temur Tohirovich tanlaydigan o‘yin strategiyasiga bog‘liq.

Yahyoxo‘ja Ulug‘xo‘jaev