Оз қолди! АПЛ суперклубида яна бир истеъфо кутиляпти

Англия Премьер-лигасининг 22-турида “Тоттенхэм” ўз майдонида лига аутсайдерларидан “Вест Хэм”га 1:2 ҳисобида ютқазиб қўйди.

Кутилмаган мағлубиятдан кейин “шпорлар” бош мураббийи Томас Франкнинг клубдаги келажаги хавф остида. Даниялик мураббийга бўлган босим тобора ортиб бормоқда ва бир неча манбалар  хабарига кўра, у яқин кунларда ишдан бўшатилиши мумкин.

Франкнинг ўзи “Вест Хэм”га қарши Лондон дербисидаги мағлубиятдан кейин мухлислар томонидан қарсаклар ўрнига эътирозларга учраганига қарамасдан, клуб раҳбарияти уни қўллаб-қувватлашига ишонади. Бироқ сўнгги ҳафталарда раҳбарият кайфияти ўзгаргани айтилмоқда. Клуб мураббийлар штабида ўзгаришлар керакми-йўқми, деган масалани кўриб чиқмоқда.

Агар “Тоттенхэм” яқин ўйинларда ижобий натижалар қайд этмаса, Франк ишдан бўшатилади. Клуб раҳбарияти аллақачон эҳтимолий номзодларни кўриб чиқмоқда.

Бўлажак мураббийлар рўйхатига “Борнмут”дан Андони Ираола, “Кристал Пэлас”дан Оливер Гласнер киритилган. Асосий номзод сифатида эса клуб билан илгари катта муваффақиятларга эришган Маурисио Почеттино қаралмоқда. Бироқ аргентиналик мураббийнинг қайтиши фақат 2026 йилги жаҳон чемпионатидан кейин амалга ошиши мумкин, чунки у ҳозир АҚШ терма жамоасини бошқармоқда.

Почеттино 2019 йилда беш йиллик фаолиятдан сўнг “Тоттенхэм”ни тарк этган, бу даврда жамоа Чемпионлар лигаси финалига чиққан. Кейинчалик у ПСЖ ва “Челси”ни бошқарди ва ҳозир АҚШ терма жамоаси бош мураббийи ҳисобланади.

Почеттино қўл остида “Тоттенхэм” 293 та ўйин ўтказиб, шулардан 160 тасида ғалаба қозонган ва 2016 йилда Премьер-лига чемпионлигига жуда яқин келган.