Озарбайжонлик мураббий ўзбек боксчиларнинг Токио Олимпиадасидаги имкониятига баҳо берди

Гариб Оруджев номи Озарбайжон бокс оламида тез-тез тилга олиниб туради. Чунки у ўз вақтида ҳаваскор йўналишда бир неча марта мамлакат чемпиони бўлган, Европа чемпионатида икки бор иштирок этган. Қолаверса, халқаро турнирларда ҳам яхши натижалар кўрсата олганди. Ҳозирда профессионал йўналишда бир қатор шогирдлари ўз фаолиятини олиб бормоқда.
У бир неча маротаба Ўзбекистонга ҳам ташриф буюрганди. Сабаби юртимизда бўлиб ўтган профессионал бокс оқшомларида унинг шогирдлари рингга кўтарилганди. Шунинг учун у ўзбек бокси ҳамда боксчилари ҳақида яхшигина маълумотга эга.
Шуни инобатга олиб у билан қисқача суҳбатда бўлдик. Қуйида ушбу интервьюни эътиборингизга ҳавола этамиз.
- Ассалому алайкум.
- Вaалайкум ассалом.
- Бугун сиз билан сайтимиз учун бироз суҳбат қуриш ниятида эдик.
- Жуда ҳам хурсанд қилдингиз.
- Ўзбекистонга тез-тез ташриф буюрасиз. Демак, мамлакатимиз профессионал бокс оламидаги инсонлар билан дўстона муносабатга эгасиз?
- Албатта. Аввало, юртингиз боксини ривожида Ғофур Раҳимовнинг ҳиссаси катталигини таъкидлаб ўтишни истардим. У нафақат Ўзбекистон, балки бутун дунёда ушбу спортни ўз ўрнига эга бўлишида хизмати сингган.
Шубҳасиз, дўстларим бор. Набижон Исмонов, Зуфар Сулаймонов ва Нодирбек Нажмиддиновлар билан жуда қадрдонмиз.
- Ўз вақтида яхши боксчи бўлгансиз. Балки, фаолиятингиз мобайнида ўзбекистонлик чармқўлқоп усталари билан тўқнаш келгандирсиз?
- Ҳа. 2001 йил "Буюк ипак йўли" турнирида тўқнаш келганмиз. У 2000 йил Сидней Олимпиадасида 81 кг вазнда учинчи ўринни қўлга киритганди. Биз у билан 91 кгда жанг қилганмиз. Ҳозир исм-шарифи ёдимдан кўтарилибди.

- Сергей Михайлов...
- Ҳудди ўзи.
- Жанг натижаси қандай бўлганди?
- Тўғриси, мен ўша вақтда ўз вазн тоифамда ҳаракат қилмагандим.
- Тушунарли... Балки Михайловнинг савияси қандай эканлиги ёдингиздадир?
- Унинг қандай боксчи эканлигини натижалари ҳам айтиб турибди. Лекин у билан жуда қизиқарли жанг бўлганди.
- Ўзбек профессионал бокси ҳақидаги таассуротларингиз қандай?
- Фақат ижобий фикрлар билдириш мумкин. Икки йўналишда чемпионга эга бўлганинглар ҳам буни исботи десам, янглишмаган бўламан. Бу борада жиддий ишлар олиб борилмоқда. Шунингдек, жуда кучли ҳаваскор бокс мактаби профессионал йўналишда ҳам асос бўлиб хизмат қилмоқда. Яна шуни айтиш мумкинки, юртингизда ҳаваскор ҳамда профи боксни ривожлантириш учун жуда катта жамоа мехнат қиляпти.
- Озарбайжонда бу борада қандай ишлар амалга оширилмоқда?
- Профессионал бокс борасида ёш мамлакатлардан биримиз. Чунки бу йўналишда иш бошланганимизга эндигина уч йил, федерация очилганига эса уч ой бўлди. Мехнат қилишда давом этмоқдамиз. Ўйлайманки, тез орада натижалар ҳам яхшиланади.
- Нуфузли мусобақаларда озарбайжонлик дзюдо, эркин ва юнон-рум кураши вакиллари ажойиб натижалар қайд этишади. Ушбу спорт турлари мамлакатингизда боксга нисбатан оммавийроқми?
- Бу яккакураш турлари Собиқ Иттифоқ давридан буён миллий спорт турларимиз даражасида ўз ўрнига эга. Боксни янада ривожлантириш учун тўғри йўналишни йўлга қўйиш керак. Озарбайжоннинг барча ҳудудларида бокс бўйича кучли БЎСМлар фаолият юритиши керак деб ўйлайман.

- Кубалик Сотомаёрни маҳаллийлаштиришга муносабатингиз қандай?
- Бу мен учун ҳам жуда оғриқли ҳолат. Аслида, легионерларни жалб қилиш боксни ривожлантиради деган фикрда эмасман.

-2019 йил октябрь ойида Элвин Охунзода Тошкентда жанг қилди. Гарчи мағлубиятга учраган бўлса-да, мухлисларда ёмон таассурот қолдирмади. У ҳам сизнинг шогирдингизмиди?

- Элвин билан яхши муносабатдаман. Унга ёрдам беришга ҳаракат қиламан.

- Токио Олимпиадасида қайси ҳамюртингиздан яхши натижа кутмоқдасиз?
-Бундай катта турнирларда ҳар қандай боксчи ўзини кўрсатиши мумкин.

- Ушбу Олимпиадада ҳам ўзбекистонлик боксчилар етакчиликни сақлаб қола оладими?
- 100% улар етакчи бўлади. Бу борада уларга омад тилайман!

- Мазмунли суҳбатингиз учун ташаккур.

- Раҳмат.