Ўзбек боксчиси ёшлар ўртасидаги WBC жаҳон чемпионлик камари учун жанг қилиши мумкин

Профессионал бокснинг биринчи ўрта вазн тоифасида (69, 853 кг) ўз жангларини ўтказиб келаётган ёш ҳамюртимиз Равшан Махамматжонов ёшлар ўртасидаги WBC жаҳон чемпионлик камари учун жанг қилиши мумкин.

Ушбу боксчимизнинг мураббийи Зуфар Сулаймоновнинг сайтимизга маълум қилишича, бу борада музокаралар давом этмоқда. Унинг рақиби украиналик Владимир Гордиенко бўлиши кутилмоқда. 20 ёшли украиналик чармқўлқоп устаси фаолияти мобайнида 9 та жанг ўтказиб, уларнинг 8 тасида ғалаба қозонган. Бир бора мағлубиятга учраган. 3 марта рақибларини нокаут ҳолатига тушира олган.

21 ёшли ҳамюртимиз эса, 10 маротаба рингга кўтарилиб, барчасида ғалабага эришган. 7 бора рақибларини нокаутга учратган. Шу ўринда айтиб ўтиш лозимки, ёшлар ўртасидаги ушбу титул учун 24 ёшга қадар бўлган ва рекорди яхши кўриниш олган боксчилар жанг олиб бориши мумкин. Мазкур жанг қачон ва қаерда бўлиши тез орада маълум бўлади. Воқеалар ривожини бизда кузатиб боринг!