Ўзбек футболчилари легионерга айланишга тайёр

Ўзбекистон миллий терма жамоасининг Қатардаги Осиё чемпионатидаги муваффақиятли иштироки юир неча футболчиларимиз учун хорижий чемпионатларга йўл очиб берди.

Умуман олганда, турли ёш тоифадаги терма жамоаларимизнинг қитъа ва жаҳон чемпионатларидаги кўрсаткич ва натижалари хорижий клублар скаутларини ўзбек футболчиларини кузатишига асос бўлаётгани сир эмас.

Ўзбек футболи тарбияланувчилари нафақат Осиё клублари, балки Европанинг “топ-5” лигаларига ҳам ўта бошлади. Бунга охирги ярим йилда Абдуқодир Ҳусанов “Ланс”га, Муҳаммадали Ўринбоев “Брентфорд”га ўтгани ва  Диёр Ҳолматовга “Лечче” жиддий қизиқиш билдираётгани ва трансферга тайёргарлик кўраётганини мисол қилиш мумкин.

Футболчиларимиз учун Россия чемпионати ҳам муҳим аҳамият касб этади. Премьер-лига легионер учун Европага йўл очиб бериши билан аҳамиятли. Сўнгги йилларда бу мусобақада тобланган бир неча футболчи топ-лигаларга ўтиб кетди.

Ўз даврида Москванинг “Спартак” жамоасида тўп тепган Жаъфар Ирисметов россиялик журналистларга берган интервьюсида ўзбек футболи тарбияланувчилари Россияга бориб ўйнашга тайёрлигини билдирди.  

— Ўзбек футболчиларига Россия Премьер-лигасига ўтиш қизиқми ёки чекловлар туфайли бу лига эътиборни жалб қилмаяптими?

— Россия Премьер-лигаси ҳамон футболчилар эътиборида. Албатта, футболчилар орасида Жанубий Корея ёки Саудия Арабистони каби мамлакатларга йўл олишни истаётганлар ҳам бор. Лекин Россия чемпионат ҳам ҳамон долзарб.

Агар Россия Премьер-лигасидан чорлов бўлса, йигитлар албатта боради. Шунингдек, Россияда Аббосбек Файзуллаевнинг кучайиб кетгани ҳам бунга сабаб бўлади. Мен бир неча легионерлар кетгани билан Россия Профессионал лигаси кучсизланиб қолади, деб ўйламайман.

— Остон Ўруновнинг ўсишини қандай изоҳлаш мумкин? Яқинда унинг фаолияти якунланиш даражасига етиб қолганди...

— Охирги мавсумда у “Навбаҳор”да ўзини кўрсата олди. Лекин Осиё кубогида маҳоратини тўлиқ  намойиш қила олди, деб айтолмайман. Яна позиция масаласи кўтарилди, уни деярли марказий ҳужумчи қилиб қўйишди, бу позиция умуман унга тўғри келмайди.

Қатар билан ўйинда Ўрунов яхши ўйнади. Бошқа учрашувларда кўзга ташлангани йўқ.

Эслатиб ўтамиз, жорий мавсумда Россия Премьер-лигасида учта жамоада беш нафар ўзбек футболчиси рўйхатдан ўтказилган эди.

ЦСКАдаги легионеримиз Аббосбек Файзуллаевнинг ишлари беш. У ҳозирги жамоасини фақатгина кучли лигаларга ўтганида тарк этиши мумкин. “Рубин”даги Рустам Ашурматов ва Умарали Раҳмоналиев асосий таркибга кириш учун курашни давом эттирмоқда.

“Нижний Новгород” жамоаси икки легионеримизни бошқа жамоаларга ўтказиб юборди.ёш ҳужумчи Руслан Жиянов “Навбаҳор”га, чап қанот ҳимоячиси Иброҳимхалил Йўлдошев “Қайрат”га кўчиб ўтди.   

“Навбаҳор”да ишлаган мураббий Файзуллаевни “Бавария”га ўтказиш йўлини айтди

Европалик агент: “Бавария”нинг Файзуллаевга қизиқиши бежиз эмас...

Осиё кубоги футболчиларимизга янги жамоаларга йўл очди

Файзуллаевдан зўр футболчиларимиз бор!

Файзуллаевнинг Европада ўйнаш имконияти борми?