“Навбаҳор”да ишлаган мураббий Файзуллаевни “Бавария”га ўтказиш йўлини айтди
Қатардаги Осиё кубоги Ўзбекистон миллий терма жамоасининг бир неча футболчиларига янги жамоалар эшигини очиб берди.
Бироқ барчанинг эътиборида Аббосбек Файзуллаев масаласи турибди. Элдор Шомуродов терма жамоамизга ёрдам бера олмагач, етакчилик вазифасини 20 ёшли Аббосбек ўз зиммасига олди. Қитъа чемпионатидан нуфузли мусобақада бу масъулиятни ўзига олиш ҳар кимнинг ҳам қўлидан келавермайди.
Футбол жамоатчилиги Файзуллаевнинг Европа “топ-5” лигаларида ўйнай олиш салоҳиятини муҳокама қилмоқда. Айниқса, 20 ёшли ҳужумкор футболчини “Бавария” кузатаётгани ҳақидаги хабар анча шов-шувларга сабаб бўлди.
Ўзбек футболи билан яхши таниш бўлган Андрей Канчельскис легионеримизнинг Мюнхен суперклубига трансфер қилиш учун нималарни амалга ошириш лозимлигини айтиб берди.
– Агар “Бавария”дан Аббосбек Файзуллаев бўйича расмий таклиф тушадиган бўлса, бу трансфер ҳақида алоҳида гаплашиш мумкин бўлади. Кўпинча бизда муҳокама учун ҳам бунақа хабарлар тарқатиб турилади.
Албатта, агар расмий чорлов келиб тушса, Файзуллаевни қўйиб юбориш керак. Унга кучли лигаларда ўйнаб кўриш имконини бериш лозим. Лекин буни ЦСКА раҳбарияти ҳал қилади.
– Осиё кубогида Аббосбек Файзуллаев яхши ўйнади. Вақти келиб, Россия Премьер-лигасида ўсишдан тўхтаб қолмайдими?
– Ҳа, биз Осиё кубогини томоша қилдик. Россия Премьер-лигасигасига келсак, савия юқори эмаслиги ва тушиб бораётгани кўриниб турибди. Буни айримлар англаб етгани йўқ.
Агар таклиф бўлса, Аббоснинг янада ўсишига қўйиб бериш керак. Балки ЦСКА ва “Бавария” ўртасида хайрия учрашувларини ташкил қилиш лозимдир. Ана шундай иккита учрашувни ўтказиш орқали пул жамғариш имкони бор. Агар трансфер амалга ошиб қолса, пул ҳам ишлаб олса бўлади.
Агар футболчи “Бавария”га ўтадиган бўлса, бир умр ЦСКАдан миннатдор бўлади, мен бунга аминман, - деди Андрей Канчельскис.
Андрей Канчельскис футболчи сифатида Европанинг қатор лигаларида муваффақиятли тўп тепгани билан машҳур.
Ўз даврида бу ярим ҳимоячи Англиянинг “Манчестер Юнайтед”, “Саутгемптон”, “Манчестер Сити”, “Эвертон”, Шотландиянинг “Глазго Рейнжерс”, Италиянинг “Фиорентина” каби жамоаларида ўйнаган.
Кансельскис икки мартадан Англия ва Шотландия чемпиони, Европа Суперкубоги ғолиби ва бир қатор нуфузли совринлар соҳиби бўлган.
Фикрлар