Ўзбек футболчисига “Манчестер Сити”, ПСЖ ва “Атлетико” харидор!

20 декабрь, 19:25
0
Футбол

Қишки трансферлар даври яқинлашгани сари клублар ўзларига керакли футболчиларни олиш имкониятини чамалаб чиқмоқда.

Олдиндаги трансфер ойнаси даврида ўзбек футболи тарбияланувчиларидан Абдуқодир Ҳусановнинг бозори қайнадиган кўринади.

Европа матбуоти “Ланс”да порлаётган ҳимоячининг харидорлари кўпайиб бораётганини ёзмоқда.

Хусусан, нуфузли манбалардан бири L'Équipe нашри Абдуқодир Ҳусанов учун курашга “Манчестер Сити”, ПСЖ ва “Атлетико” клублари ҳам қўшилганини маълум қилди.

Аслида легионеримизнинг кучли клублар эътиборига тушгани ҳақидаги маълумотлар бир неча ойдан бери тарқатилмоқда.

Бу 20 ёшли марказий ҳимоячимизнинг мавсум бошида Кевин Дансонинг ўрнига “Ланс” асосий таркибига киритилганидан бирданига юқори савияда ўйнай олганидан кейин бошланган жараён ҳисобланади.

Абдуқодир Ҳусанов жамоаси қандай натижа қайд этишидан қатъи назар, ҳар бир учрашувда ишончли ўйнамоқда. Футболчимизнинг ҳимоя чизиғининг исталган нуқтасида ўйнай олиши, тезкорлиги, яккакурашларда енгилмаслиги, тўпни ҳар қандай масофага аниқ етказиб бериши, айниқса, кутилмагандаги подкатлари ва елкама-елга курашдаги маҳорати унинг кучли жиҳатлари сифатида эътироф этилмоқда.

Экспертлар ўзбек ҳимоячисининг салоҳияти ва маҳоратини инобатга олиб, унинг Европанинг ҳар қандай жамоасида ўйнай олиши мумкинлигини алоҳида таъкидлаяпти.

Юқори номи келтирилган “Манчестер Сити”, “Атлетико” ва “Пари Сен-Жермен” каби гранд клублардан ташқари, Абдуқодирга бошқа даъвогарлар ҳам борлигини унутмаслик керак.

Хусусан, турли манбаларда ўзбек ҳимоячиси Англия Премьер-лигасидан “Арсенал”, “Челси”, “Эвертон”, “Ньюкасл”, Германия Бундеслигасидан “Байер” ва “Лейпциг”, Франциядан “Марсель” каби клублар кузатувида экани ҳақида маълумотлар тарқатилмоқда.

“Ланс” тез орада бюджетга 40 миллион евро атрофида тушиб қилиши талаб этилади. Бу орқали Франция клуби молиявий фэйр-плейни таъминлаган бўлади. Лансликлар бу миқдордаги тушумни ўтган ёз олмоқчи эди. Бироқ Кевин Дансо ва Нил Ал-Айнауининг “Рома” ва “Монако”га трансферлари барбод бўлиши ортидан клуб молиявий жиҳатдан муаммога тўқнаш келди.

Transfermarkt портали Абдуқодир Ҳусановни янгиланган рейтингда 12 миллион еврога баҳолаб, Марказий Осиёнинг энг қимматбаҳо футболчиси айлантирди. Бу сумма мавсум охирига қадар янада кўтарилиши кутилмоқда.

Шунга қарамай, 12 миллион евро “Ланс” раҳбариятини қониқтирмайди. Лансликлар мавсум кашфиётига айланган ўзбек футболчисини айни пайтда нафақат Франция, балки бутун Европадаги энг истеъдодли ёш ҳимоячи, деб билади ва унинг трансфери учун анча юқори нарх талаб қилмоқчи.

Трансферлар бўйича экспетларнинг таъкидлашича, “Ланс” Абдуқодир Ҳусанов трансфери орқали клубга 30 миллион евро тушум қилмоқчи. Бу нарх ҳимоячини январда олмоқчи бўлаётган клублар учун долзарб. Ёзга бориб, Ҳусановнинг нархи кўтарилса, “Ланс”нинг талаби ҳам ошиши табиий.