Ўзбек мухлисларига яхши таниш бўлган мураббий легионерларимиз тўп сураётган жамоани бошқаради

Тожикистон чемпионатида биринчи давра баҳслари якунланди. Куни кеча тўрт нафар ҳамюртимиз тўп сураётган “Хўжанд” клубида бош мураббий ўзгарди. Бунга қадар ушбу лавозимда ишлаб келган сербиялик Никола Лазаревич бир ой вақт давомида бетоблиги сабабли ватанига кетганди. Қолаверса, пандемия туфайли ҳам у Тожикистонга қайта олмаётганди. Натижада “Хўжанд” раҳбарияти бош мураббийликка ўзбек мухлисларига яхши таниш бўлган Ҳаким Фузайловни тайинлади.

Хабарингиз бўлса, Ҳаким Қаюмович ўз вақтида юртимизда ишлаган ҳолда “Бухоро”, “Динамо”, “Андижон” ҳамда “Локомотив” клубларини бошқарган. Энди эса фаолиятини “Хўжанд”да давом эттиради. Яқинда эса унинг укаси – Раҳматилло Фузайлов “Куктош” жамоасидан истеъфога чиқарилгани ҳақида хабар бергандик.

Айтиш мумкинки, “Хўжанд” биринчи давранинг охирги турида “Душанбе-83” жамоасини 1:0 ҳисобида мағлуб этди. Хўжандликлар сафида эса Маъмур Икромов, Санжар Рихсибоев, Сирож Ҳамроев ва Андрей Сидоров сингари ҳамюртларимиз тўп суришмоқда. Маълумотларга қараганда, Ҳаким Қаюмович янги жамоаси билан иккинчи даврага тайёргарлик ишларини бошлаб юборган. Биринчи даврадан сўнг "Хўжанд" чемпионатда 2-ўринни эгаллаб турибди.