Ўзбек спортининг ёрқин ғалабалари акс этган ҳужжатли фильм тасвирга олинади

Бу йил мамлакатимиз бўйлаб Ўзбекистон Республикаси давлат мустақиллигининг 30 йиллиги кенг нишонланади. Энг улуғ ва энг азиз байрам арафасида мустақил Ўзбекистоннинг истиқлол йилларида турли соҳаларда эришилган ютуқлари ифода этилган туркум киносолномалар ва ҳужжатли фильмлар тайёрланиши режалаштирилмоқда. Бундан кўзланган мақсад – ютуқлар ўз-ўзидан келмаётганлиги, унга қанча заҳматлар чекиб, машаққатли меҳнатлар натижасида эришилаётгани ҳамда бунинг ортида кимлар турганини халққа етказишдан иборат.

 

Шу мақсадда ўзбек спортининг ёрқин ғалабалари акс этган ҳужжатли фильм тайёрланиши режалаштирилмоқда. Бу ҳақда Жисмоний тарбия ва спорт вазирлиги ҳамда Миллий олимпия қўмитаси раҳбарияти иштирокидаги ўтказилган онлайн йиғилишида таъкидланди.

Йиғилишда Жисмоний тарбия ва спорт вазирининг биринчи ўринбосари Равшан Эрматов, вазир ўринбосари Нодир Муротов, МОҚ раиси Рустам Шоабдураҳмонов, МОҚ Бош котиби Ойбек Касимов, шунингдек вазирлик ва қўмитанинг бошқарма бошлиқлари иштирок этди. Суҳбатда 2021 йил юртимизда бўлиб ўтиши кутилаётган халқаро мусобақалар, уларнинг ташкилий масалалари, йил давомида соҳа олдига қўйилган вазифаларни бажариш режалари кўриб чиқилди.

Шунингдек, йиғилиш давомида яқин орада ўтказилиши кутилаётган дзюдо бўйича Тошкент “Катта дубулға” турнири, “Наврўз” халқаро марафони, профессионал боксчимиз Муроджон Аҳмадалиевнинг чемпионлик камарларини ҳимоя қилувчи жангига пухта тайёргарлик кўриш, улар доирасида халқаро спорт ташкилотлари раҳбариятини ҳам юртимизга таклиф қилиб, ўзаро ҳамкорлик алоқаларни янада мустаҳкамлаш борасида атрофлича фикр-мулоҳазалар билдирилди.