"Ўзбекистон чемпионати Марказий Осиёда энг кучлиси, истеъфодан қўрқмайман, кўз остимизга олиб қўйган янги футболчилар бор" ёхуд Ҳаким Фузайлов "Динамо"ни Суперлигага олиб чиқишга қодирми?

Мухлисларимизга жуда яхши таниш бўлган тожикистонлик Ҳаким Фузайлов бу йил яна юртимизга қайтди.

Биласиз, ушбу мутахассис Самарқанднинг “Динамо” клубини бошқариб келяпти. Унинг олдига жамоани Суперлигага қайтариш вазифаси қўйилган. Бу йўлда Фузайлов футболда тўплаган бор билим ҳамда тажрибаларини ишга солишига тўғри келмоқда.

Sports.uz мухбири Ҳаким Қаюмович билан клубдаги иши, кейинги режалар ва терма жамоалар ҳақида суҳбатлашди.

- Ҳаким Қаюмович, олдинлари “Бухоро”, “Андижон” ва “Локомотив” жамоаларини бошқарганингизни яхши биламиз. Аммо ўшанда сиз элитада ишлагансиз. Бу сафар Суперлигада эмас, балки про-лигада иш бошладингиз. Юртимизга ушбу қайтишингиз ўзингиз учун мураббийликдаги ортга ташланган қадам эмасми?

- Нега энди бу ортга ташланган қадам бўлсин? “Андижон”га қадар ҳам “Динамо”да ишлаганман, ўшанда бу жамоа олий лигада ўйнарди. Ўша пайтда “Динамо” чемпионатда олтинчи ўринни эгаллаган. Бу яхши натижа. Қолаверса, Самарқанд жамоаси Кубок финалига ҳам чиққанди. Мени яна “Динамо”га чорлашди. Мен буни ортга ташланган қадам, деб ҳисобламайман. Жамоа олдига вазифа қўйилган. Мураббийнинг иши эса олдига қўйилган вазифани бажаришдан иборат. Мен бунда бирор-бир қўрқинчли нарсани кўраётганим йўқ.

- Жамоадаги ишингиздан қониқяпсизми?

- Мураббий ўз ишидан ҳеч қачон қониқиш ҳосил қилмайди. Шунчаки, у ишида давом этар экан, қўйилган вазифаларни бажариш пайида бўлади.

фузайлов3_1

- “Динамо” таркибида йиғилган барча футболчилардан кўнглингиз тўқми ёки чизиқлар бўйича жиддий муаммолар борми?

- Бу масалада дабдурустдан ҳаммасидан тўла қониқиш ҳосил қилдим, дейиш осон эмас. Чунки клубга январь ойи ўрталарида келдим. Февраль ойининг бошида эса, заявка бериш талаб қилинарди. Мен келган пайтда, клубда атига тўрт нафар футболчи бор эди холос. Шу боис, шошилинч тарзда футболчиларни жамлашга ҳаракат қилдик, вазият шуни тақозо қиларди. Табиийки, бундай маҳалда селекцияда хатолар кузатилади. Айтмоқчиманки, таркибдаги бир қанча позицияларни кучайтиришимиз талаб қилинмоқда. Бу тушунарли. Вазифани бажариш учун ҳам трансфер ойнаси очилган заҳоти бу масалани ҳал этиш керак бўлади. Ўз-ўзидан жамоани кучайтириш учун трансферларга қўл уришимиз тайин.

- Демак, бу борада янги ўйинчилар билан музокаралар кетяпти экан-да?

- Албатта, гапингизда жон бор. Аммо ҳозирда трансфер ойнаси ёпиқлиги боис биз бу борада бир нарса дейишимиз қийин. Фақат ўзимизни қизиқтираётган футболчиларни кузатиш билан чекланишимизга тўғри келяпти. Албатта, боя айтганимдек, позициялар бўйлаб уларни кучайтириш ҳақида бош қотиряпмиз.

- Клубдан кетадиган ўйинчилар борми?

- Биринчи давра тугаб бўлди, эртадан иккинчи давра бошланади. Трансфер ойнаси 5 июлдан очилади. Табиийки, трансфер ойнаси очилганидан кейин таркибни кучайтиришни бошлаймиз.

фузайлов1_1

- Янги ўйинчилар ким: маҳаллий ижрочиларми ёки легионерларми?

- Олдиндан айтишим керакки, биз асосан маҳаллий футболчиларни кузатмоқдамиз.

- Бир неча йил ўтиб яна Ўзбекистон чемпионатига қайтдингиз. Айтинг-чи, чемпионатимизда қандай ўсиш ва бунинг акси ўлароқ, пасайишларни кўряпсизми?

- Ҳар ерда бўлгани каби Ўзбекистонда ҳам футбол ривожланиб бормоқда. Ахир вақт бир жойда турмайди. Бинобарин, футбол ҳам шундай. Шуни ҳеч иккиланмай айтишим мумкинки, Ўзбекистон Марказий Осиёда энг кучли, рақобатбардош чемпионатга эга бўлган давлат саналади. Бу ерда ўз олдига жиддий мақсадларни қўйган клублар талайгина. Аксар жамоаларда эса ҳали ёш ва ўзларини кўрсатиш иштиёқида ёнаётган мураббийлар ишламоқда. Бу борада Ўзбекистонда албатта олдинга катта силжиш бор, деб баралла айта оламан. Маълумки, энди миллий терма жамоалар иштирокидаги учрашувлар учун ўйинлар бошланяпти. Ўйлайманки, Ўзбекистон терма жамоасида ўзи учун узоқ вақтдан бери армон бўлиб келаётган ЖЧга йўлланма олиш борасида бу сафар яхшигина имконият юзага келган. Бўлажак жаҳон чемпионатида Ўзбекистон терма жамоаси иштирок этадиган бўлса, бундан сира ажабланмайман.

фузайлов_6

- Терма жамоалар мавзуси бошланган экан, сиздан Тожикистон термаси ҳақида сўрамасам бўлмайди. Биласиз, Усмон Тошев терма жамоани тарк этмоқда. Бу ҳақида фикрингиз қандай?

- Тожикистон терма жамоаси ўзидан ёмон таассурот қолдиряпти, дея олмайман. Миллий термамиз таркибида ёш, иқтидорли футболчилар тўп сурмоқда. Қолаверса, “Истиқлол” Осиё Чемпионлар лигасидаги иштироки орқали тожик футболчилари қўлларидан кўп иш келишини исботлаб берди, дейишим мумкин. Бизда ёш футболчилардан иборат яхши авлод камолга етяпти. Шу кетиш бўлса, охир-оқибат Тожикистон терма жамоаси жаҳон чемпионати йўлланмаларидан бирига эга чиқиши мумкин, деб ўйлайман. Қолаверса, Осиё Кубогига чиқиш ҳам асосий вазифалардан бири.

- Ҳаким Қаюмович, про-лигада интрига анча кучайган. Чунки “Бухоро”, “Нефтчи”, “Динамо”, “Олимпик”, “Хоразм” клублари Суперлига йўлланмалари учун қизғин кураш олиб боришяпти. Шахсан ўзингиз “Динамо”ни Суперлигага олиб чиқиш йўлида неча фоизга ишоняпсиз?

- Ҳозир бу борада 100 фоиз тўлиқ ишонч билан бирор нарса дейиш қийин. Чунки “Динамо”дан ташқари сиз санаб ўтган бошқа рақобатчилар ҳам шунчаки томошабин бўлиб туришмайди. Бари ўз олдига Суперлигага кўтарилиш вазифасини қўйган. Албатта, биз шу мавсумни юқори нотада тамомлаш учун охиригача ҳаракат қиламиз. Тўғри, “Нефтчи” билан “Бухоро” “Динамо”га нисбатан молиявий томондан анча яхши шароитда. Аммо биз ҳам ўйинни тўғри ташкил қила олсак, вазифани бажара оламиз, деб умид қилиш мумкин. Шу йўналишда охиригача ишлашда давом этамиз.

- “Динамо”нинг ўйинларида қайд этаётган натижалари жуда қизиқарли. Клуб ҳисобида бирорта ҳам дуранг йўқ. “Динамо” ўйинларни ё ютяпти, ёки мағлубият билан якунлаяпти.

- Агар мағлубиятга учраган ўйинларимизни эсга оладиган бўлсангиз, “Динамо”нинг рақибларига йирик эмас, балки минимал ҳисобда имкониятни бой берганлигини кўришингиз мумкин. Бу ўйин борасида бошқа рақиблардан асло ортда қолмаганлигимизни исботлайди. Аксинча, бир қанча учрашувларда устунликка эга бўлганмиз. Бахтга қарши якуний натижа биз кутгандек бўлмаган. Мен буни анча учрашувлар видеоёзувини кузатиш орқали таҳлил қилганим эвазига гапиряпман. Бу - футбол.

фузайлов4

- Футболда натижалар мураббийнинг фаолиятини белгилаб беради. Агар натижа кўнгилдагидек кўриниш олмас экан, ҳар қандай жамоада раҳбарият асосий айбдор сифатида бош мураббийни ишдан бўшатишга ҳаракат қилади. Демоқчиманки, “Динамо”даги фаолиятингиз охирига етмасдан тугаши мумкинлигидан хавотирга тушмаяпсизми?

- Йўқ. Футболда шундай ёзилмаган қоида бор: жамоа ютади, мураббий эса ютқазади. Табиийки, натижа раҳбариятни қониқтирмас экан, мураббий истеъфога чиқарилади. Бундан қўрқувга тушиш ярамайди. Чунки ҳатто номи чиққан манаман деган мураббийлар ҳам натижа ўхшамай қолган пайтда ишдан бўшатилмасдан қолмаётганини ҳамма кўриб турибди.

- Суперлигани кузатаётган бўлсангиз, сизга кўпроқ қайси жамоалар ёқяпти?

- Мен бир ёки иккита клубни кўрсата олмайман. Аксинча, Суперлигада қатор жамоалар иштирокидаги ўйинлар менда яхши таассурот қолдирмоқда. Албатта, биринчи навбатда “Пахтакор”нинг ўйинини кўрсатган бўлардим. Қолаверса, чемпионлар таркибида ёш футболчиларга имкон тақдим қилинмоқда. Жумладан, менда Диёр Холматов яхши таассурот қолдиряпти. Шунингдек, Ҳожимат Эркиновни ҳам кўрсатишим мумкин. Менда яна “Сўғдиёна” ҳам яхши ўйинлари билан илиқ таассурот қолдиряпти. Жамоа таркибидаги футболчилар 3-4 йил давомида бирга тўп сураётганлари сабабли “Сўғдиёна”нинг қайд этаётган натижалари тобора яхшиланиб боряпти. Яна “Насаф”ни ҳам алоҳида кўрсатишим мумкин. Бир сўз билан айтганда, Суперлигада қатор клублар барчада илиқ таассуротлар қолдирадиган ўйинлар намойиш этяпти. Айнан бошқа иштирокчилар ҳам майдонда йўқолиб қолишмаяпти. Шунинг эвазига Суперлига доирасидаги баҳслар жуда қизғин курашларга бой тарзда ўтяпти, деб айта оламан.

- Про-лига ҳақида нима дея оласиз?

- Про-лигада ҳам кураш ёмон кечмаяпти. Аммо барибир Суперлигага таққослаганда про-лига даражасидаги ўйинларда фарқ бор.

Фикрлар

Фикр қолдириш учун авторизациядан ўтинг!