"Ўзбекистон менталитетини, турмуш тарзини жуда соғингандим" - "Нефтчи" мураббийи Суперкубокдан кейин яна нималарни айтди?

"Нефтчи" клуби ҳақли равишда бу йилги Ўзбекистон Суперкубогини қўлга киритди. Бунинг учун жамоа катта ҳажмдаги ишни бажара олди.

Мураббийлар штаби ҳам жиддий меҳнат қилгани кўриниб турди. Бу борада жисмоний тайёргарлик бўйича мураббий Антонио Сариоглуни ҳам алоҳида эътироф этса арзийди. У футболчиларнинг жисмоний ҳолатини маромига келтириб қўйибди.

Клуб матбуот хизмати эса ушбу мутахассис билан суҳбатлашди.

— Илгари ҳам Ўзбекистонда фаолият юритгансиз. Bu сафар янги жамоага мослашиш жараёни ҳақида гапириб берсангиз. 

— Биринчи дақиқаданоқ жамоа раҳбарияти ва бош мураббий менга лойиҳани тақдим этганида, мен жуда катта ҳаяжон ҳис қилдим. Футболга бўлган иштиёқим ва муҳаббатим мени дунёнинг кўплаб жойларига олиб борди. Aммо "Нефтчи" менга кўрсатган истиқбол сабаб аввал оилам билан, кейин эса жаноб Купер билан гаплашдим ва охир-оқибат унинг мураббийлар штабини тарк этишга қарор қилдим. Унинг розилиги ва яхши тилаклари билан "Нефтчи" таклифини қабул қилдим. Мослашув жараёнига келсак, бунга вақт ҳам бўлмади. Чунки Анталиядаги биринчи иш куниданоқ жуда қаттиқ иш бошладик. Кўп соатлик машғулотлар, кўплаб ўртоқлик учрашувларини ўтказдик. Фарғонага қайтгач, расмий ўйинларга эътибор қаратишимиз керак эди. Бундан ташқари, футболчиларимизга бутунлай бошқача профессионал кундалик ҳаётини таклиф қилишни хоҳладик. Бу эса катта меҳнат ва сабр-тоқатни талаб қилади. Шу билан бирга Ўзбекистоннинг менталитети ҳамда турмуш тарзини аллақачон билардим ва ростини айтсам, буни жуда соғингандим 

— Суперкубок ўйинига келсак, финал хуштагидан кейинги хис туйғуларингиз ҳақида... 

— Мен ханузгача бунга тўлиқ ишониб улгурмадим - гўё орзудек туюляпти. Лекин совринни қўлга киритиш - бу таърифлаб бўлмайдиган туйғу. Ҳаяжон, қувонч, ўзини оқлаганлик ҳисси, бу жуда ажойиб эди. "Нефтчи" билан яна кўплаб лаҳзаларни бошдан кечириш учун қаттиқ меҳнат қиламан 

— Футболчилар майдонга тушишидан олдин уларга нима дедингиз?

— Кийиниш хонасидан чиқишдан олдин уларга тўлиқ диққатни жамлашларини сўраб, "бир-бирингизга ишонинг, бир-бирингиз учун курашинг ва биз ғалаба қозонамиз, дедим. 

— Стадиондаги муҳит ҳақида, уни Европа ўйинларидаги муҳит билан солиштирса бўладими? 

— Мен аллақачон мухлисларимиз билан ўзгача бир боғлиқликни ҳис қиляпман. Улар менинг жамоам "Арис Тҳессалоники" мухлисларини эслатади. Бизда бир хил ранглар, бир хил фанатизм, жамоага бўлган бир хил севги бор. Улар жамоани ҳамма жойга кузатиб боришади. Ҳатто, маскотимиз ҳам бир хил - йўлбарс! Бир кун келиб икки клуб ўртасида биродарлик бўлишини жуда хоҳлардим.