Ўзбекистон ОТЖ Жанубий Кореяга ютқазиб қўйди. Аммо кейинги босқичга йўл олди

Яна бироздан сўнг Таиланд пойтахти Бонгкок шаҳридаги "Таммасат" стадионида Ўзбекистон - Жанубий Корея баҳси бошланади.

Ўйин Тошкент вақти билан 15:15да старт олади.

Сиз шу ерда беллашувнинг матнли трансляциясини кузатиб боришингиз мумкин. Шунингдек, ўйиннинг видеотрансляцияси ҳам мавжуд.

U-23 Осиё чемпионати. Ўзбекистон - Жанубий Корея учрашувини ЖОНЛИ ЭФИРда томоша қилинг

* Ассалому алайкум қадрли футбол мухлислари.

* Ўзбекистон - Жанубий Корея ўртасидаги баҳснинг матнли трансляциясини сиз шу ерда кузатиб боришингиз мумкин.

* Жамоаларнинг бошланғич таркиблари:

1* Ўйин бошланди.

3* Жанубий Кореяликлар илк дақиқалардан ҳужумга ўтишганди. Аммо ҳимоячимиз рақибнинг уринишини бартараф этганди.

5* Афсуски, кореяликларнинг иккинчи ҳужуми гол билан якунланди. Жеонг Сеунг Вон тепган тўп дарвозамиздан ўрин олди.

9* Жанубий Корея тинмаяпти. Футболчиларимиз ўзларини йўқотиб қўйишди.

11* Тезкор гол рақибни янада кучайтириб юборди. Ҳужумлар кетидан ҳужумлар...

16* Керея футболчилари кетма-кет икки марта бурчак зарбасига эга бўлишди. Биринчисини ҳимоячиларимиз бартараф этишди. Иккинчисида эса рақиб ўйинчиси жуда ноаниқ зарба берди.

19* Олимпиячиларимиз ниҳоят ўзларига келди. Тўп назоратини қўлга олишга уринишмоқда.

21* ГОООООООООООООООООООООООООООООООООООООООООООООООЛЛЛЛЛЛЛЛЛЛЛЛЛЛЛЛЛЛЛЛЛЛЛ. Азизжон Ғаниев ўнг қанотдан оширган тўпни Бобир Абдихолиқов боши билан тўрга киритди.

24* Мана ҳисоб тенглашди. Ўйиннинг бориши ҳам. Энди ҳамюртларимиз янада фаол бўлишлари керак.

26* Жасурбек Яхшибоев ўнг қанотдан жарима майдонига яқинлашди ва зарба йўллади. Тўп йўналиши бироз ноаниқ.

29* Жанубий Корея футболчиси чап қанотдан оширган тўпни дарвозабонимиз ушлаб олди.

34* Айни пайтга келиб майдонда тенг кураш кечмоқда. Жамоалар вақти-вақти билан олдинга ўтишга уринмоқда. Аммо ҳозирча томонларнинг ҳаракатлари ўхшамаяпти.

37* Кореяликлар қанотларда фаоллик кўрсатишмоқда. Бўйи баланд футболчилари борлиги учун юқоридан тўп оширилмоқда.

40* Биринчи тайм охирларига келиб, кореяликлар тўпга эгалик қилишмоқда. Вакилларимиз эса қарши ҳужум тактикасидан фойдаланишмоқчи.

44* Рақибимиз танаффусга ғалаба билан чиқиб кетишни мақсад қилган кўринади. Кетма-кет уринишлар юзага келмоқда. Аммо ҳимоячиларимиз уларни дарвозага яқинлаштирмасликка ҳаракат қилишмоқда.

* Биринчи таймга 2 дақиқа қўшиб берилди.

* Жамоалар танаффусга 1:1 ҳисобидаги дуранг билан йўл олишмоқда.

46* Иккинчи бўлим бошланди.

48* Вакилларимиз таймни яхши бошлашди.

50* Жасурбек Яхшибоев марказдан жарима майдонига яқинлашиб келиб, ерлатиб зарба берди. Бироз ноаниқ.

54* Энди Жанубий Корея тўпга эгалик қилишни бошлади. Вакилларимиз эса уларни кутиб олишмоқда.

57/ Ҳожиакбар Алижонов ўзининг чап қанотидан жарима майдонига ёриб кирмоқчи бўлди. Аммо ҳимоячилар тўпни майдон ташқарисига чиқариб юборишди.

58* Бурчакдан оширилган тўпдан сўнг вакилларимиз дарвоза томон бир нечта зарба беришди. Бироқ рақиб посбони биринчи уринишда тўпни қайтарди, иккинчисида эса ҳимоячилар.

61* Ҳозирги дақиқаларда кореяликлар иккита вазият яратишди. Бироқ иккиси ҳам юқоридан ўтиб кетди.

65* Жамоалар эҳтиёткорликка асосланган ҳолда тўп тепишмоқда. Яъни ўйин темпи бироз пасайди.

67* Ҳусниддин Алиқулов рақибнинг комбинациясини бартараф этиб, тўпни майдон ташқарисига чиқариб юборди.

71* Ойбек Бозоров ўрнига Нурилло Тўхтасинов майдонга тушди.

71* Ох Су Хун жарима майдони яқинидан тўпни ерлатиб дарвозамизга жойлаб қўйди. Бу вазиятда посбонимиз ҳар қанча ҳаракат қилмасин, жамоамизни голдан сақлаб қола олмади.

75* Жасурбек Яхшибоев тўпни қабул қилиб олиш жараёнида рақибига қўполлик қилгани учун жарима зарбаси белгиланди.

78* Кореяликлар яна темпни оширишмоқда. Гол уларни яна олдинга ундамоқда.

78* Абдулла Абдуллаев ўрнига Ойбек Рустамов майдонга тушди.

80* Илҳом Алижонов рақибнинг жуда ҳам хавфли зарбасини қайтариб, жамоасини голдан қутқариб қолди.

83* Вакилларимиз худди биринчи таймдагидек саросимага тушиб қолишди. Гол руҳий жиҳатдан футболчиларга қаттиқ таъсир қилди.

84* Яна Ҳусниддин Алиқулов жамоа жонига оро кирди. Дарвозабонимиз унга миннатдорчилик билдириб қўйди.

86* Ойбек Рустамов кам сонли ҳужумимизни кўкка совурди.

89* Бобир Абдихолиқов ўрнига Миржаҳор Мираҳмадов майдонга тушди.

90* Икинчи таймга 5 дақиқа қўшиб берилди.

90+1* Ойбек Рустамов огоҳлантирилди. Рақибни йиқитгани учун.

90+5* Ўйин тугади. Имкониятни бой бердик. Аммо Эрон Хитойга қарши баҳсда 1:0 ҳисобида ғалаба қозонгани боис тўплар фарқига кўра Ўзбекистон ОТЖ кейинги босқичга йўл олди.