Ўзбекистон терма жамоасининг рақиби Камерун ҳақида. Уларнинг кучли ва кучсиз томонлари нимада?

Ўзбекистон миллий терма жамоаси сентябрь ойидаги халқаро йиғин доирасида иккита ўртоқлик учрашуви ўтказади. Вакилларимиз Жанубий Кореяда жаҳон чемпионати иштирокчилари – Камерун ва Коста-Рикага қарши майдонга тушади. Айтиш жоизки, мазкур жамоалар ўз қитъасининг етакчиларидан бири ҳисобланади. Шу боис, бугун улар ҳақида тўлиқ маълумот беришга ҳамда кучли ва кучсиз томонларини кўриб чиқишга ҳаракат қиламиз. Дастлаб, Камерундан бошлаймиз.

Ўзбекистонга қарши ўйин учун рақибимизнинг қайдномаси:

Камерун

Лақаби: “енгилмас шерлар”

ФИФА рейтинги: 38-ўрин

Жаҳон чемпионатининг 8 карра иштирокчиси (1982, 1990, 1994, 1998, 2002, 2010, 2014, 2022)

Бош мураббий: Ригобер Сонг

2022 йилнинг 1 мартида Сонг жаҳон чемпионати саралаши плей-офф ўйинлари олдидан Камерун миллий терма жамоасига бош мураббий этиб тайинланди. Бунгача у асосий жамоада ёрдамчи бўлиб ишлаган. Шунингдек, Камерун олимпия терма жамоаси устози сифатида ҳам фаолият олиб борган.

Айтиш жоизки, Сонг Камерун терма жамоасидаги фаолияти давомида кўплаб муваффақиятларга эришган. Хусусан, у футболчи сифатида тўртта жаҳон чемпионати иштирокчиси ҳисобланади. Ҳозирча унинг бу натижаси янгилайдиган футболчи топилмаяпти. Ригоберт Сонг ўтказилган ўйинлар сони бўйича ҳам миллий терма жамоа рекордчисидир (137).

Камеруннинг ўйин схемаси: 4-4-2

Ўйин услуби: чуқур ҳимоя, тезкор қарши ҳужум.

Камерун янги мураббий қўл остида қандай ўйин кўрсатиши ҳозирча номаълум. Чунки Сонг бошчилигида камерунликлар атиги учта ўйин ўтказишди. Айтиш керакки, улар рақибдан келиб чиқиб ҳаракат қилади. Жамоа кўпроқ рақиб ҳимоя чизиғига юқоридан узун пас берган ҳолда ҳужум ташкил қилади. Буни кўпроқ “Манчестер Сити”нинг ўйинига қиёслаш мумкин. Инглиз клубида бутун жамоа Эрлинг Холанд учун ўйнаса, рақибимизда Леандр Тавамбага юқоридан тўп етказиб берилади. “Енгилмас шерлар” баъзида вазиятдан келиб чиқиб, майда паслар орқали ҳам ўйнаши мумкин.

Жамоа етакчилари

Андре-Франк Замбо-Ангисса – ярим ҳимоя чизиғининг асосий футболчиси

"Наполи"нинг 26 ёшли ярим ҳимоячиси кўп йиллар давомида Камерун терма жамоаси шарафини ҳимоя қилиб келади. Андре Италия клубига ўтишдан олдин “Вильярреал”, “Фулхэм” ва “Марсель” каби жамоаларда ўйнаган. Аммо биз Ангисса ҳақида ортиқча тўхталмаймиз. Чунки у терма жамоа йиғинига чақирилмаган.

Карл Токо-Экамби – Камеруннинг асосий ҳужумкор футболчиларидан бири.

“Лион”нинг чап қанот вингери “енгилмас шерлар” сафида 50 та ўйинда 12 та гол урган. Унинг ажойиб техникаси бор. Агар унга таъриф берадиган бўлсак, унинг ҳаракатларини олдиндан айтиб бўлмайди дея оламиз. Эслатиб ўтамиз, айнан Токо-Экамбининг Жазоирга урган голи Камерунга Қатардаги ЖЧ йўлланмасини қўлга киритишга ёрдам берган.

Венсан Абубакар — жамоа тўпурари ва сардори.

30 ёши футболчи “енгилмас шерлар” сафида 87 та ўйин ўтказган бўлиб, айни пайтда жамоанинг энг кекса футболчиси ҳисобланади. У  Камерун сафида 33 марта рақиблар дарвозасини ишғол қилган ҳолда жамоасининг энг яхши тўпурар бўлиб турибди. Шу боис, сардорлик боғичи ҳам айнан “Ал Насср” футболчисига ишониб топширилган. Абубакар жисмонан кучли ҳужумчи ҳисобланади. Унинг яхшигина тезлиги ҳам бор. Айтиш керакки, Венсан ва Шупо-Мотинг тандеми камерунликларга жуда катта фойда келтиради.

Умаман олганда, Камерунда Европа клубларида ўйнайдиган топ даражадаги футболчилар етарлича. Аммо биз барчасини санаб ўтмаймиз, лекин Андре Онана, Бриан Мбемо ва Эрик-Максим Шупо-Мотинг номларини алоҳида келтиришимиз лозим.

Афзалликлари ва камчиликлари

Кучли томонлари: жисмоний ҳолат, ҳаводаги кураш.

Камчиликлари: позицион ҳужум, плеймейкер йўқлиги.

Жисмоний тайёргарликка келсак, ҳаммаси жуда оддий - жамоа жуда кучли ва тезкор. Жаҳон чемпионати саралаши доирасидаги Жазоирга қарши жавоб ўйинининг 120-дақиқасида ҳам камерунликларнинг жисмонан яхши ҳолатда бўлганлиги, уларнинг тайёргарлиги қай даражада эканлигидан далолат беради.

Шунингдек, улар иккинчи қаватда ҳам яхши ўйин намойиш этади. Статистикага кўра, Камеруннинг голларидан учдан бир қисми бош билан урилади. Бундан ташқари, Абубакар-Шупо-Мотинг тандеми кўп ҳолларда жамоага катта ёрдам беради. Сабаби, иккаласи ҳам баланд бўйли ҳужумчилар ҳисобланади.

Позицион ҳужум - бу Камерунда деярли йўқ нарса. Балки асосий муаммо ярим ҳимояда креатив ўйинчи - плеймейкер йўқлигидир. Улар одатда 4-4-2 схемасида ҳаракат қилади, аммо ўйин пайтида бу 4-2-2-2 кўринишини олади. Яъни, марказда ҳаракат қиладиган икки футболчи таянч чизиғида ўйнаса, яна икки футболчи ҳужумчи ортида ҳаракат қилади.

Жамшидбек Маҳмудов