Ўзбекистонда мундиални “ёндирадиган” учта футболчи бор!
2026 йилги жаҳон чемпионатида илк бор 48 мамлакат терма жамоаси қатнашади. Ҳозиргача мусобақа мезбонлари – АҚШ, Канада ва Мексикадан ташқари яна 15 та миллий жамоа жаҳон чемпионатига чиқиб бўлган.
Қувонарли томони, мундиал йўлланмасини нақд қилганлар орасида Ўзбекистон миллий терма жамоаси бор. Европа футболининг нуфузли манбаси – GOAL.COM сайти яқинда навбатдаги жаҳон чемпионатида фаворитлар рейтингини тузиб чиққан эди. Эътиборли жиҳати шундаки, бу рейтингда Ўзбекистон миллий терма жамоаси 25-поғонада қайд этилди.
Бундан ташқари, GOAL.COM экспертлари жаҳон чемпионатига йўлланма олган ҳар бир терма жамоанинг имкониятларини ҳам чамалаб чиқмоқда.
Sports.uz портали европалик мутахассисларнинг Ўзбекистон миллий терма жамоаси имкониятига берган баҳосини ўзбекистонлик футбол ишқибозлари эътиборига ҳавола этади.
- Жуда кўп бой берилган имкониятлар ва муваффақиятсизликлардан кейин Ўзбекистон миллий терма жамоаси, ниҳоят, келаси ёзда бўладиган 2026 йилги жаҳон чемпионатида дебют қиладиган бўлди.
Мундиалга чиқиш йўли осон бўлгани йўқ. Бош мураббий Сречко Катанец саломатлигидаги муаммолар туфайли январдаёқ истеъфога чиқишга мажбур бўлди. Терма жамоанинг собиқ ярим ҳимоячиси Тимур Копадзе словениялик мураббий бошлаган ишни охирига етказди.
2025 йилнинг 5 июнь куни Бирлашган Араб Амирликлари майдонида ўтган учрашувда голсиз дуранг ўйнаган Ўзбекистон саралаш гуруҳида иккинчи ўринни нақд қилиб, жаҳон чемпионати йўлланмасини қўлга киритди.
Бу жамоа ўйинчиларининг ўзига бўлган ишончи яқинда “CAFA Nations cup 2025” халқаро турнири финалида Эрон миллий терма жамоаси учтидан қозонилган 1:0 ҳисобидаги ғалабадан кейин янада мустаҳкамланди. Бу ўзбекларнинг охирги ўнта учрашувда ўз дарвозаси дахлсизлигини сақлаб қолган еттинчи ўйини бўлди.
Шуни таъкидлаш жоизки, бўлажак жаҳон чемпионатида Ўзбекистон миллий терма жамоасининг плей-оффга чиқиш имконияти кўп жиҳатидан “Манчестер Сити” футболчиси Абдуқодир Ҳусанов бошчилигидаги ҳимоя чизиғининг ўйинига боғлиқ бўлади.
Бундан ташқари, ҳужум чизиғида ҳам ёрқин истеъдодлар борлигини унутмаслик керак. Терма жамоа сардори Элдор Шомуродов “Рома”да ўйнаган ва бу мавсумни “Истанбул Башакшеҳир”да ўтказмоқда. Бу клуб яқинда яна бир салоҳияти юқори ўйинчи – 21 ёшли Аббосбек Файзуллаевни ўз таркибига қўшиб олди, - деб ёзди GOAL.COM портали.
23-маротаба ташкил этилаётган навбатдаги жаҳон чемпионати 2026 йилнинг 11 июнидан бошланади ва 19 июлга қадар давом этади. Ҳозиргача йўлланмани қўлган киритганлар орасида Ўзбекистон ва Иордани илк бор мундиалда иштирок этиш бахтига муяссар бўлади.
Гвардиола ҳаммани “чойхона”га чақирди
Ҳусанов ўрнига жаҳон чемпиони келади!
Ҳусановнинг устози суперрекорд ўрнатди
Ҳусанов жамоасида яна жиддий ўзгариш бўлади: Холанд ва Родри кетиши кутиляпти
Комментарии