Ўзбекистонлик ФИФА инструктори Тожикистонда

Тожикистон футбол федерацияси матбуот хизматининг берган хабарига қараганда, 12 апрель куни Турсунзода шаҳридаги “Ширкент” меҳмонхонасида “FIFA /МАRefereeing course” номи остида тожикистонлик футбол ҳакамлари учун ФИФА томонидан ўқув-курслари бошланди.

Беш кун давомида ФИФА йўриқчилари, ўзбекистонлик Фарҳод Абдуллаев ва Юлия Тарасова тожикистонлик ҳамкасблари учун назарий ҳамда амалий машғулотлар ўтказишади.

Ҳакамлар учун мўлжалланган мазкур курсларда шунингдек, тожикистонлик йўриқчилар – Равшан Ишматов, Ажмал Амиров ва Кристина Пронженколар иштирок этмоқдалар. Улардан ташқари, бу курсда 31 нафар ҳакамлар машғулотларда иштирок этишяпти.

Ўқув-курслари бошланиши олдидан Тожикистон футбол федерацияси вице-президенти Алишер Ўрунов қатнашди. У келган меҳмонларни илиқ қарши олди. Йиғилганлар олдида чиқиш қилар экан, Ўрунов бундай курслар тожикистонлик ҳакамларнинг билимларини янада мустаҳкамлашда ёрдам беришидан умид қилаётганини билдирди.