Озгина қолди! Шик Обамеянг ва Левандовски изидан кетяпти

Германия чемпионати — Бундеслиганинг олтинчи турида «Байер» (Леверкузен) ўз майдонида «Фрайбург» устидан муҳим ғалабага эришди. Учрашувда чехиялик ҳужумчи Патрик Шик ҳал қилувчи гол муаллифига айланиб, жамоасига ғалаба олиб келди.

Шу тариқа Патрик Шик Бундеслига тарихида мавсумнинг дастлабки олти турининг ҳар бирида гол уришга муваффақ бўлган учинчи футболчи сифатида тарихга кирди. 

Ундан олдин бу натижага фақат икки ҳужумчи эришган: 2015/16 йилги мавсумда «Боруссия Дортмунд» сафида Пьер-Эмерик Обамеянг (у илк саккиз турда гол урган) ва 2019/20 йилги мавсумда «Бавария» форварди Роберт Левандовски (у умуман олганда қаторасига 11 тур давомида тўп киритган).

Энди эътибор «Байер»нинг навбатдаги ўйинига қаратилган. Клуб кейинги турда «Хоффенхайм»га қарши майдонга тушади ва мухлислар Патрик Шик яна бир бор ўзини намоён этиб, ажойиб ўйин кўрсатишига умид қилмоқда.