O‘zi nima bo‘ldi?! "Barselona"ning Evropa ligasigacha bo‘lgan "shonli yo‘li"

Yozgi transferlar oynasida tarkibini sezilarli darajada kuchaytirgan va ayni dam La Ligada 1 – o‘rinda borayotgan klub Chempionlar Ligasidan Evropa Ligasiga tushib ketishi mumkinligiga ishonasizmi? Sezib turganingizdek, gap “Barselona” haqida ketmoqda. Eng qizig‘i, o‘tgan mavsumda ham klub guruhdan chiqa olmay, Evropa Ligasining chorak finaligacha etib borgandi. Biroq o‘sha paytda “Barsa”ni oqlash uchun sabablar bor edi. Ispan grandi yaqin-yaqingacha eng yomon davrlaridan birini boshidan o‘tkazayotgandi. Birgina misol, o‘tgan mavsum Chempionlar Ligasining 2 – turidan so‘ng Ronald Kuman ishdan bo‘shatildi. 5 – turda esa Xavi klubda ish boshladi. Ya’ni 6 ta o‘yinda “Barsa”ni 3 ta murabbiy boshqardi. Bunday vaziyatda sevimli jamoangizdan nimadir talab qilish adolatdan bo‘lmasa kerak. Lekin ayni paytda vaziyat bunday emas. Garchi, klubda moliyaviy muammolar etarli bo‘lsa-da, Joan Laporta Xavi xohlagan deyarli barcha futbolchilarni olib keldi. Balki endi natijalar talab qilinsa, adolatdan bo‘lar.

“Inter”dan uchralgan mag‘lubiyatdan so‘ng “Barselona”da pley-offga chiqish imkoni juda past. Qisqa qilib aytganda, keyingi turda Milan jamoasi “Viktoriya Plzen”ni mag‘lubiyatga uchratsa, “ko‘k-anorranglilar” Evropa Ligasiga yo‘l oladi. Hech qanaqasiga imkon qolmaydi. Ammo futbolda ham mo‘jizalar bo‘lib turadi. Mana shu mo‘jizalar ayni paytda “Barsa” muxlislariga juda zarur. Keling, klub nima uchun bu darajaga kelib qolganin tahlil qilib ko‘ramiz.

1-sabab. “O‘lim” guruhi

Albatta, ilk sabab guruhdagi jamoalar. “Barselona” nafaqat “o‘lim” guruhiga tushdi, balki ohirgi yillardagi eng noqulay raqibi bo‘lmish “Bavariya” bilan bir kvartetdan joy oldi. “Barsa” muxlislarini bitta narsa hursand qilishi mumkin. Klub oldingilariga nisbatan bu safar myunxenliklarga etarlicha qarshilik ko‘rsata oldi. Hatto nemis klubini yutib qo‘yishi ham mumkin edi. Keyingi raqib - “Inter”. Bu klubning ishlari Italiyada yaxshi bo‘lmasligi mumkin, lekin Inzagi shogirdlari maydonda ikkinchi raqamli jamoa bo‘lib harakatlanish bo‘yicha master-klass o‘tib berdi. To‘g‘ri, “Barsa” ko‘proq hujum qilgan, ko‘proq zarba bergan bo‘lishi mumkin. Ammo bularning endi nima qizig‘i bor?

2-sabab. Himoya juda zaif.

Xavi bekorga yozda ko‘proq himoyani kuchaytirishga harakat qilmagan. Klubning nozik nuqtasi oldin ham himoya edi. Kunde va Arauxodan so‘ng Kristensen ham jarohat oldi. Himoyada deyarli boshqa variant qolmadi. Maydonda Jerrard Pike va Erik Garsiya juftligini o‘ynatish vaqti keldi. Albatta, “Barsa”ga “Inter” bilan ikkinchi o‘yindagi boy berilgan ochkolar juda alam qildi. Sababi, Pikening oddiy vaziyatda qilgan xatosi Garsiyaga ham ta’sir qildi, shekilli, u ham juda yomon o‘yin o‘tkazdi. Vaholanki, birinchi bahsda Erik ancha yaxshi taassurot qoldirgandi. Balki bunday zaif himoyaga sherik qilib, tayanch zonada agressivroq bo‘lgan Frank Kessie asosiy tarkibda tushirilishi kerakdir. Serxio Buskets baribir ham hujumlarni uyushtirishda, markazni boshqarishda qo‘l keladi. Lekin bu o‘yinda ko‘proq himoyaga yordam berish kerak edi.

3-sabab. Tarkibning noto‘g‘ri tanlanishi

Bu sababni bir misol bilan boshlamoqchiman. Xavi “Inter”ga qarshi o‘yinda Rafinyani chap qanotda o‘ynatib xatoga yo‘l qo‘ydi. Vinger maydonda deyarli ko‘ringani yo‘q. Ikkinchi o‘yinda murabbiy buni sezib qoladi va darhol uni o‘z pozitsiyasiga qaytaradi.



Birinchi o‘yinda yana bir futbolchining o‘yini chiqmagandi. Bu – Markos Alonso. Ammo keyingi o‘yinda u yana asosiy tarkibda qoldi. Alexandro Balde zahiradan maydonga tushib, bitta asisst amalga oshirdi. Bu mavsum ancha o‘ziga bo‘lgan ishonchi oshgan va tobora yaxshilanib borayotgan Alexandro o‘rniga o‘yini chiqmasa ham 32 yoshli ispaniyalikni o‘ynatishdan nima foyda bo‘ldi? Jordi Alba esa muxlislarning esidan chiqib ketgan bo‘lsa xam ajab emas.



Bundan tashqari, Xavi nimaga katta uchrashuvlarda De Yongni kam o‘ynatayapti, degan savol sizni ham o‘ylantirayotgan bo‘lsa kerak. To‘g‘ri, Gavi talant bo‘lishi mumkin. Hamma eski Inesta va Xavi juftligin qaytishini xohlaydi, ammo Gavira va Frenkining o‘rtasida fark katta. Kamiga niderlandiyalik yarim himoyachi zahiradan maydonga tushib, o‘yinni ancha kuchaytirdi. Bundan ko‘rinadiki, futbolchining sport formasi joyida yoki gap boshqa erda bo‘lishi ham mumkinmi? Yozda De Yonga bir necha klublardan taklif bo‘ldi. Xatto “Barsa” “Manchester Yunayted” bilan og‘zaki kelishuvga erishdi, degan edi insayder Fabritsio Romano. Klub ushbu transferdan yaxshigina daromad ko‘rishi mumkin edi. Shunday bo‘lsa-da, futbolchi barcha takliflarni rad qilib, shu erda qolishni tanladi. Go‘yo, Xavi ham uning ketishini xohlaydi. Shu yo‘l bilan De Yongni boshqa klubga o‘tishga ko‘ndirmoqchimikan, degan taxminlar kelib qoladi kishi hayoliga.