Панкратион бўйича Ўзбекистон чемпионатида қайси вилоят жамоаси ғолиб бўлди ёхуд навбатдаги бекат Фарғона!

Бухоро шаҳри мезбонлик қилган навбатдаги панкратион бўйича Ўзбекистон чемпионати ҳам юқори нотада ўз якунига етди. Мазкур чемпионат ўсмирлар, ёшлар ва катталар ўртасида ташкил этилади. Яъни, 12-13, 14-15, 16-17, 18-20 ёш ва катталар ўртасида бўлиб ўтади. 
Шуни алоҳида таъкидлаб ўтиш керакки, 16-17, 18-20 ва катталар ўртасидаги баҳслар жорий йил октябрь ойида Тошкентда ташкил этилувчи жаҳон чемпионатига саралаш вазифасини ҳам ўтаб берди. 3 кун давом этган мамлакат биринчилиги кескин ва шиддатли курашларга бой тарзда кечди. Умуман олганда ташкилотчилик ва жангларнинг савияси юқори даражада бўлди. 
Якунда, умумжамоа ҳисобида бухоролик спортчилар 7 та олтин, 6 та кумуш, 14 та бронза медали билан 1-ўринни қўлга киритишди. 7 олтин, 4 та кумуш, 9 та бронза билан Тошкент шаҳри жмоаси 2-ўринни банд қилган бўлса, 3 та олтин 7 та кумуш билан қашқадарёлик панкратиончилар 3-ўринни эгаллашди. 
Шу тариқа панкратион бўйича Ўзбекистон чемпионати  ғолиб ва совриндорлари аниқ бўлди. Навбатдаги бекат Фарғона! 28-30 август кунлари водийнинг энг сўлим шаҳри грепплинг бўйича Ўзбекистон чемпионатига мезбонлик қилади.