"Пахтакор" футболчиси легионерга айланиши кутилмоқда

Ўзбекистон миллий терма жамоаси ва "Пахтакор" клуби ҳужумчиси Игорь Сергеев фаолиятини хорижда давом эттириши мумкин.

SPORTS.uz сайтига маълум бўлишича, Сергеев Хитой ёки БАА клубларидан бирига ўтиши кутилмоқда. Қолаверса, "Пахтакор" йиғин ўтказиш учун БААга жўнаб кетди. Клуб матбуот хизмати хориж йиғинига олиб кетилган футболчилар рўйхатида Игорнинг йўқлигини кўришимиз мумкин. Бу эса у айни пайт музокаралар олиб бораётган бўлиши мумкин.

Игорь Сергеев бир ой аввал SPORTS.uz сайтига берган интервьюсида хориждан таклиф борасидаги саволга қуйидагича жавоб берганди: "Бу саволингизга тайинли жавоб беришим қийин. Чунки ҳозир ҳеч нарса аниқ эмас. Эртага нима бўлишини ҳеч ким олдиндан айта олмайди. Қолаверса, хорижга чиқишим билан боғлиқ аниқ таклиф бор, дея олмайман".