"Пахтакор" iTicket.uz билан ҳамкорликни йўлга қўйди

Эндиликда "Пахтакор"нинг уй учрашувларига чипталарни онлайн харид қилиш имкониятига эга бўласиз. Бу ҳақда клуб матбуот хизмати хабар тарқатмоқда.

Унга кўра "Пахтакор" ишқибозлари ва футбол мухлисларига қулай шароит яратиш мақсадида "Пахтакор" футбол клуби "iTicket.uz" компанияси билан ҳамкорликни йўлга қўйган.  Энди жамоа ўйинларига чипталарни уйдан чиқмаган ҳолда ёки интернет мавжуд бўлган исталган жойда сотиб олишингиз мумкин. Бунинг учун "iTicket.uz" сайти ва иловасига киришингиз кифоя.

Ушбу компания чипталар савдоси ва халқаро мусобақаларда ахборот кўмаги бериш бўйича катта тажрибага эга ҳисобланади. Ўз хизматини ишончли ва хавфсиз тарзда тақдим қиладиган "iTicket.uz" хизматидан Ўзбекистон футбол ассоциацияси ҳам фойдаланиб келмоқда, миллий терма жамоа учрашувларига чипталар сотиш хизмати муваффақият билан тақдим этилди.

Эслатиб ўтамиз, “Пахтакор” жорий мавсумдаги биринчи уй ўйинини 10 февраль куни Осиё Чемпионлар Лигаси гуруҳ босқичи доирасида БААнинг "Шабаб Ал Аҳли" жамоасига қарши ўтказади. Ўйин "Пахтакор" стадионида бўлиб ўтади.