"Пахтакор" ОЧЛ охирги турида қандай қилиб "Насаф"га ёрдам берди? "Шерлар" Суадияга фақат мезбонларни ютгани борганмиди?

Осиё чемпионлар лигаси гуруҳ босқич 6-турида "Пахтакор" - "Ал-Таъавун" баҳси ўтказилди. Унда "шерлар" 5:4 ҳисобида рақибдан устун келди.

Шу тариқа, Славче Войнески шогирдлари 6 турда 6 очко билан гуруҳда сўнгги поғонанадан жой олди. "Ал-Таъавун" ҳисобидаги 7 очко ўзгаришсиз қолди.

Айни вақтда ўз гуруҳида иккинчи ўринда бораётган Саудия Арабистони клубининг очко йўқотиши "E" гуруҳида иккинчи ўринни эгаллаб турган "Насаф" учун қулай натижа ҳисобланади.

Ушбу ҳолатда ПФЛ бош директори Диёр Имомхўжаев ҳам телеграмдаги саҳифасида ўз муносабатини билдирди.

- "Пахтакор" Саудияга Саудия клубини енгиш учун борганга ўхшайди. Босимсиз ўйнаса, мезбонлар дарвозасига 5 талаб гол урса бўларкан. Ёшларига кўпроқ эътибор қаратса, кам ҳам бўлмайдигандек.

"Пахтакор" қайсидир маънода "Насаф"га ҳам қисман ёрдам берди. "Ал-Таъавун" энг яхши 2-ўрин эгалари рўйхатида камида "Насаф"дан олдин бўла олмайди, - деди Диёр Имомхўжаев.

Маълумот учун, ғарбий минтақада 5 та гуруҳдан 3 та энг яхши 2-ўрин соҳиблари плей-офф босқичига йўл олади.