"Пахтакор" янги трансферларни қачон эълон қилади?

"Пахтакор" таркибга легионерлар.жалб қилишда давом этади Клубнинг кейинги мақсади иккита бразилиялик футболчи билан шартнома имзолаш. 

"Sports.uz"га маълум бўлишича, жамоа Жонатан ва Жонатан Луккани ўз таркибига қўшиб олишга яқин турибди. Улар билан клуб оғзаки келишувга эришди. 

Жонатаннинг 2025 йилнинг ёзига қадар амал қиладиган шартномаси бор. Шу билан бирга, ярим ҳимоячи Лукканинг ҳам ўз клуби билан тузган битими 2027 йилгача амал қилади. Айни пайтда томонлар шартномаларни бекор қилишга ҳаракат қилишмоқда. Шундан кейин иккала футболчи ҳам 4-5 январда "Пахтакор"нинг Антальядаги йиғинига қўшилишади ва шу кунлари тиббий кўрикдан ўтишади. 

Жонатан (дарвозабон)

Фаолиятида 2017 йилгача Бразилия клубларида тўп тепган дарвозабон Португалияга кўчиб ўтди. Шундан сўнг бу мамлакатнинг "Морейренс", "Вит. Гимараэш" жамоаларида ҳаракат қилди. 2021 йилда эса "Риу Аве" уни дастлаб ижарага олиб, кейинги мавсум шартнома имзолади. У ўз вақтида асосий таркиб футболчиси ҳисобланган. Бу мавсум лигадаги 8 та баҳсда майдонга тушди, қолган 8 тасида эса ёш кипер Цезари Миштага имкон берилди. 

Лукка (ярим ҳимоячи)

Луккани Педро Морейра катта эҳтимол билан таянч ярим ҳимоячи сифатида ўйнатади. Сабаби, клуб айнан ушбу позицияга ўйинчи қидираётганди. 2012 йилда "Рома"га уни ўз сафига қўшиб олган ва умуман майдонга туширилмаган. Шундан кейин Бразилияга қайтади. 2015 йилда эса Зико уни Ҳиндистонга таклиф қилади. "Гоа" клубидаги бир мавсумлик ижарадан сўнг яна ўз ватанига келади. 2018 йилда ярим ҳимоячининг Португалиядаги саёҳати бошланади. 2023 йилда АВС САД билан 2027 йилгача амал қиладиган шартнома имзолайди. Ўтган мавсум жамоа иккинчи дивизиондан биринчисига кўтарилди. 

"Шерлар" келаси ойда бу трансферларни эълон қилади. Унгача бошқа футболчилар билан битимни янгилаш ишларини олиб боради. Тез орада Достон Ҳамдамов жамоада қолгани эълон қилинса, ундан кейин Сардор Собирхўжаевнинг якуний қарори маълум бўлади, яъни ярим ҳимоячига Суперлиганинг бошқа клубларидан таклифлар бор, лекин "Пахтакор" у билан шартномани янгилашни истайди.

Суҳроб Холбеков