"Пахтакор"дан кетган Славче Войнески: "Жамоа ичидаги муҳит яхши эмас. Ҳаттоки, кичик гуруҳларга бўлиниб кетган"

Бир неча кун олдин "Пахтакор" клуби матбуот хизмати бош мураббий Славче Войнескининг ишдан олингани ҳақида маълум қилди. SPORTS.uz мухбири дарҳол шимолий македониялик мутахассис билан боғланиб, унинг фикрлари билан қизиқди. Қуйида интервьюдан қисқа парча келтирамиз.

- Максим Шацких клуб спорт директори этиб тайинланганидан кейин нима ўзгарди?

"Аввало, Ирисметов ва Ходиевнинг кетишига тўхталсам, бу кетишлар бироз эртароқ содир бўлди. Чунки бу каби катта ўзгаришлар чемпионатдаги қайсидир ўйиндан олдин бўлиши керак эмасди. Айтмоқчиманки, “Сурхон”га қарши беллашувдан бир кун олдин ушбу расмийлар клубдан кетишди. Албатта, бундай ҳолатлар жамоада мувозанатни йўқолишига сабаб бўлади.

Ўйлайманки, мазкур мутахассислар жамоа билан мавсум якунигача ёки давра охиригача қолганида, бизда камида +6 очко бўлиши мумкин эди. Улар кетганидан сўнг кейинги ҳафталарда руҳий жиҳатдан тайёр эмасдик, кўп очко йўқотиб қўйдик. Шацкихга тўхталсам, у келганидан кейин қандайдир янги ўзгаришни сезмадим. Фақатгина жамоада руҳий томондан босим кўпайди. Жамоа ичидаги муҳит ҳам яхши эмасди. Ҳаттоки, кичик гуруҳларга бўлиниб кетишганди. Бу каби ҳолатда жамоани бошқариш жуда қийин. Жамоадаги бўлинишлар сўнгги икки ҳафта ичида ортиб кетди. Ўшанда мен айнан шу масала ҳақида раҳбариятга ўз фикрларимни билдиргандим".

Қуйида тўлиқ интервьюни ўқишингиз мумкин:

Славче Войнески: "Пахтакор"дан кетишим бир ой аввал ҳал қилиб бўлинганди"