“Пахтакор”га осон, “Навбаҳор” ва “Нефтчи”га қийинроқ! Чемпионлик учун курашаётганлар қолган 8 турда кимлар билан ўйнайди? (Батафсил)

Айни дамда Суперлигада олтин медаллар учун кураш олиб бораётган жамоалар учун муҳим палла бошланмоқда. Сезиб турганингиздек, гап “Пахтакор”, “Навбаҳор”, “Нефтчи” ва “Насаф” квартети ҳақида бормоқда. Хўш, бу тўртликни Суперлигада қандай ўйинлар кутиб турибди? Чемпионлик учун имкониятлари қандай?

“Пахтакор”

“Шерлар”ни тақвимда кучли тўртликда бораётганлар орасида фақат “Насаф” билан ўйин кутиб турибди. Жамоа ОЧЛ гуруҳ босқичида иштирок этишини инобатга олсак, захира ўриндиғи тор бўлган “Пахтакор”га осон бўлмаслиги аниқ. Ҳозир жамоанинг жисмоний ҳолатини аъло даражада, деб бўлмайди. Айрим ўйинларда бу омил кўзга ташланиб қолмоқда. Шунга қарамай, "шерлар" ҳозирда Суперлига ғолиблиги учун асосий даъвогар бўлиб турибди. Турнир жадвалида энг яқин таъқибчисидан 7 очко илгарилаб кетгани якунда пойгада ғолиб чиқиш имкониятини оширади. Шунга қарамай, ҳозирдан қувонишга эрта. Юқоридаги икки омил – зич тақвим ва жисмоний ҳолат ҳал қилувчи турларда панд бериб қўйиши ҳеч гап эмас.

“Нефтчи”

Фарғоналиклар “Пахтакор”дан фарқли ўлароқ, кучли тўртликда бораётган икки жамоа билан тўқнаш келади. Эътиборли томони, Суперлиганинг сўнгги турида “йўлбарслар” “Навбаҳор” меҳмони бўлади. Агар икки жамоа ҳам чемпионлик имкониятини сақлаб қолган ҳолда 26-турга етиб келса, бу ички биринчилик тарихидаги энг катта тўқнашувга айланиши ҳеч гап эмас.

Шунингдек, “Насаф” билан бўладиган Қаршидаги баҳс ҳам жамоанинг чемпионлик йўлидаги бурилиш нуқтасига айланиши мумкин. Фарғоналикларни кутиб турган 8 ўйиннинг 3 таси (“Турон”, “Қизилқум”, “Бухоро”) чемпионат аутсайдерлари билан. Бу асосий рақиблар оғир ўйин ўтказаётган бир пайтда, ғалаба қозониш имкониятини оширади. Бундан ташқари, яқин уч ой ичида фарғоналиклар бор эътиборини ички биринчиликка қаратади. Қолган 3 жамоа эса 90 кун ичида 14 ва ундан кўпроқ ўйинда майдонга чиқишига тўғри келади. Мавсум охири бўлгани боис чарчоқ ва жароҳатлар фактори рол ўйнаши ҳам ҳеч гап эмас. Шу боис, “Нефтчи” чемпионлик учун охиригача кураш олиб боради. Унда етарлича имкон бор.

"Насаф"

Бердиев шогирдлари  Ўзбекистон кубоги ярим финал йўлланмасини қўлга киритгач, тиғиз тақвимдаги ўйинлар сериясини бошлаб берадиган жамоаларимиздан бири. “Насаф”ни Суперлигадаги қолган 8 ўйининг 3 таси асосий чемпионлик пойгасидаги асосий рақобатчилари билан! “Пахтакор”, “Нефтчи” ва “Навбаҳор” билан ўйинлар осон кечмаслиги аниқ.

Қўшимчасига, 26 турда “аждарлар” ОКМК меҳмони бўлади. Юқоридаги номи зикр қилинган жамоалардан фарқли ўлароқ, “Насаф” қолган 8 ўйининг барчасида катта куч билан ҳаракат қилишга мажбур.

“Навбаҳор”

“Сўғдиёна”дан қабул қилинган аламли мағлубият жамоанинг чемпионлик пойгасидаги имкониятларига салбий таъсир кўрсатгани рост. “Лочинлар” “Ал-Вакра”га қарши жуда оғир ўтган 120 дақиқа давомида катта куч йўқотгани сезилиб қолди. “Сўғдиёна” эса интенсив футбол эвазига ғалабани рақибдан юлқиб олди. Кейин Наманганда ОКМК билан нурсиз дурангга имзо чекилди. Кетма-кет бой берилган очколар сабабли жамоа мухлислар босими остида қолгани рост. Тақвим ҳам осон эмас. “Бунёдкор” ва “Сурхон”га қарши ҳақиқий жанг кутиб турган бўлса, “Андижон” билан ўйин “ёниб кетиши” аниқ. Қўшимчасига, “Навбаҳор”ни чемпионлик учун курашаётган квартетдаги икки жамоа билан ўйинлар кутиб турибди. 22-турда “Насаф” Наманганда меҳмон бўлса, чемпионатни якунлаб берувчи 26-турда “Нефтчи” “Марказий”га келади.

ОКМК

ОКМК мавсум стартини жуда ёмон ўтказганига қарамай, финиш арафасида ўйин темпига тушиб олди. ОЧЛ йўлланмаси қўлга кирибгина қолмай, жамоа Ўзбекистон кубогидаги иштирокини ҳам давом эттирмоқда. Про Лигада ишлари у қадар юришмаётган “Хоразм”ни чорак финалда рақиб эканлигини ҳисобга олсак, “кончилар” бир оёғи билан кубок ярим финалида дейиш мумкин. Ҳозирда, Олмалиқ клуби турнир жадвалида 29 очко билан 5 поғонада бормоқда. Тўғри, чемпионлик учун курашда имкониятлар жуда кам, аммо бу медаллар учун курашдан ОКМК чиқди дегани эмас. Қосимов “бандаси” яқин 3 ой ичида 15 тадан кўпроқ ўйинда майдонга тушиши талаб этилади. “Кончилар” мавсум охирига қадар “Пахтакор” ва “Насаф” билан тўқнаш келишини ҳисобга олсак,бу ўйинлардаги ғалабалар жамоани пойгага қайтариши ҳеч гап эмас.

Сизнингча, жорий мавсумда чемпионлик учун асосий даъвогар ким? Ўз фикрларингизни изоҳларда қолдиринг!