ПФЛ 2 та клубни нега четлаштирганди? Бугун Диёр Имомхўжаев жонли эфирда жавоб беради

Куни кеча Ўзбекистон профессионал футбол лигаси “Шердор” ва “Иттифоқ Навоий” футбол клублари белгиланган талабларни бажармаётгани ҳамда қатнашчилик бадали ва бошқа тўловларни ўз вақтида тўламагани учун Ўзбекистон Профессионал футбол лигаси қатнашчилари сафидан чиқарилгани борасида хабар берганди.

Шундан сўнг "Шердор" мураббийи ушбу қарордан норозилигини билдирди. Бунга эса ПФЛ жим қараб турмоқчи эмас ва мавзуга бугун жонли эфирда нуқта қўйилишини истамоқда. Бу ҳақда ташкилот директори вазифасини бажарувчи Диёр Имомхўжаев телеграмдаги ўзининг саҳифасида маълум қилди.

- Бугун соат 19:00 да Спорт-ТВ каналида чиқиш қилиб, "Шердор" ва "Иттифоқ-Навоий" футбол клублари нима учун Биринчи лигадан четлаштирилганини тушунтираман. Клуб мураббийи Бахтиёр Сатторовнинг ижтимоий тармоқларда берган баёноти ва ундаги чалкаш фикрларини конкретлаштираман.

Кеча Муборакда "Бухоро" ва "Металлург" ўйини нима сабабдан ўтказилди-ю, нега энди "Машъал"нинг "Пахтакор"га қарши ўйини сурилди, бу борада ҳам тушунтириш бераман. Алишер Никимбаевнинг ПФЛ ҳақидаги кетма-кет чиқишлари борасида саволлар бўлса, уларга ҳам жавоб қайтараман. ПФЛ ҳамма саволлар ва мавзулар учун очиқ, - деди Диёр Имомхўжаев.