Пике “Барса”га “Реал” тарбиялаган зўр ўйинчини топиб берди

Юлдузли онларини “Барселона”да ўтказган Жерар Пике клуб раҳбариятига “Вильярреал” ярим ҳимоячиси Даниэль Парехони олишни маслаҳат берди. Бу ҳақда Испаниянинг Diario AS нашри хабар тарқатди.

Айни пайтда бош мураббий Хави Эрнандес тажрибали ярим ҳимоячи Серхио Бускетснинг ўрнини боса оладиган ўйинчи қидиряпти. Бускетснинг амалдаги шартномаси мавсум охирида якунланади ва у АҚШ чемпионатига кўчиб ўтиши мумкинлиги айтилмоқда.

Шу боис, каталонияликлар ҳам Парехонинг “Барса”га кўчиб ўтишидан манфаатдор. 33 ёшли Парехо 2020 йилдан бери “Вильярреал” сафида тўп тепмоқда. Аввал “Валенсия”да ўйнаган футболчи аслида “Реал” тарбияланувчиси ҳисобланади.

Парехонинг “Вильярреал” билан амалдаги шартномаси 2024 йилнинг ёзигача тузилгани боис, каталонияликлар маълум миқдорда тўлов қилишига тўғри келади.