Питер Хюистра:

“Пахтакор” клуби иккинчи турда “Машъал”га қарши учрашувда ишончли тарзда рақибини мағлуб этди. Киритилган учта голга меҳмонлар жавоб қайтара олмадилар. Баҳс якунига етгач, ўтказилган матбуот анжуманида “Пахтакор” устози Питер Хюистра журналистларнинг саволларига жавоб қайтарди.

- Барчага хайрли кеч! Биз яна учта гол урдик ва дарвозамиз дахлсизлигини сақлаб қолганимиздан хурсандмиз, - дея гап бошлади Хюистра. - Яхши таассуротларни юзага келтириш учун биринчи ўйин ҳамиша катта аҳамиятга эга. Ўйинни яхши бошладик. Тўпни ва ўйин суръатини назорат қилдик. Тез-тез ўзимиз учун рақиб дарвозаси олдида бўш ҳудудларни яратдик ва бу орқали имкониятларга эга бўлдик ва 35 дақиқа ичида киритилган иккита голдан кейин бироз суръатни туширдик. Натижада хотиржамроқ ўйнашга ўтдик. Шунга қарамасдан иккинчи бўлимда ҳам яна ҳужумкорликни оширдик ва учрашувни жуда яхши якунладик. Ҳисобдан ҳам, ўйинни муносиб ўтказа олганимиздан ҳам қониқиш ҳосил қилдим. Энди уч кундан кейин Олмалиқда АГМК билан учрашувга тайёргарлик кўришни бошлаймиз. Бу учрашув қийин ҳамда қизиқарли бўлишини тахмин қилиш мумкин. Бор эътиборимизни бўлажак учрашувга қаратамиз.

- Азиз Турғунбоев жамоанинг ўйин услубига киришиб кета олмаяпти. Бу ҳақда нима дея оласиз?

- Янги келган ўйинчиларнинг жамоага қўшилиб кетиши осон эмас. Сардор Рашидов, Азиз Турғунбоев ва Шерзод Темиров жамоага киришиб кетиши учун тўлиқ мослашиш жараёнини босиб ўтишлари керак. Лекин ҳозирни ўзида уларнинг жамоа учун охиригача курашишаётгани мени хурсанд қиляпти.

- Эрен Дердийок учрашув охирларида тўп учун деярли курашмай қўйди. У чарчаб қолганмиди?

- Эрен ўйиндан-ўйинга яхшироқ ва кучли бўлиб боряпти. Тўғри, бугун гол ура олмади. Аммо жамоангизда шундай футболчи бор экан, рақиб ҳимоячиларини доим хушёрликда ушлаб тура оласиз. Эреннинг бутун ўйинини оладиган бўлсак, жамоа учун яхши меҳнат қилганини айта оламан.

- Осиё Чемпионлар лигаси баҳсларига ҳам оз фурсат қоляпти. Клубни тарк этган Игорь Сергеев даражасидаги ҳужумчи олиб келинмади. Бу сизнинг қарорингизми?

- Ҳар қандай ҳолатда ҳам жамоанинг бюджетидан келиб чиқиб иш тутилади. Демак, бюджет йўл қўймаган тақдирда вазиятдан келиб чиқиб иш тутилади. Бу борада ўзимизга мос ўйинчи топмадик. Лекин бошқа тарафдан таркибимиздаги ёшларга ўзларини кўрсатиш учун яхши имконият. Бугун ҳам майдонда Йўлдошев, Эркинов ва Иминов каби иқтидорларни кўрдик. Уларда катта иқтидор бор. Мураббий сифатида улар билан ишлаб, ривожлантиришга ҳаракат қилишимиз керак ва бу биз учун фойдали бўлиши мумкин. Ўтган мавсумда захира ўриндиғимизда тажрибали ўйинчилар ўтирарди. Лекин бу йил йўқотишлардан кейин захирамизда асосан ёшлар бор. Бу эса ўша таркиб ўртасидаги фарқни бироз кўрсатади.

- Бугун жамоа кўплаб сунъий равишда ўйиндан ташқари ҳолатларни яратди. Бу борада алоҳида кўрсатмангиз бўлганми?

- Албатта, буни яратдик. Чунки дарвозамиздан узоқлашгани сари рақиб ўйинчиларини ҳам узоқлаштирамиз. Шу боис буни амалга оширдик.

- Арвеладзе пайтида номи чиққан футболчиларни шунга яраша ўйинини кўрардик. Энди меҳнаткаш футболчиларнинг жанговор ўйинларини кўряпмиз. Шунда ҳам “Пахтакор” бошқалардан бир калла юқори. Бу сизни клубда ўйинни ўстиришингизга халақит бермайдими?

- Биринчи навбатда ўзимизга қабул қилган синов ва чақириқ сифатида ёш ўйинчиларнинг даражасини кўтаришга уринишимизни айтиш мумкин. Уларни ва янги футболчиларни тезлик билан ўзимизга мослаштириб чемпионлар лигасида яхши даражани сақлаб қолишимизни кўрсатишимиз керак. “Насаф” билан ўтказилган иккита ўйинимиз биз учун кескин учрашувлар бўлди. Тўғри, бугун бироз осонроқ кечди, голларни тезкорлик билан уриб олдик. АГМК билан ўйинимизни ҳам кескин ўтишини кутяпман. Айнан шуни ўзи ва ҳар бир учрашувда янги даражага чиқиб боришимиз биз учун янги синов бўлади. Шунинг учун ишлашда давом этамиз.

- “Насаф”га қарши ўйин билан бугунги баҳс ўртасида қанчалик фарқ сезилди?

- Футболда ҳар доим фарқ бўлади. Ҳаттоки, майдон масаси, қуёш чиқиши ёки шамол бўлиши...умуман, ҳар бир ўйин ўртасида фарқ бўлади. Бугун мени хурсанд қилгани футболчиларимиз ўйин бошидан охиригача ўзларини кўрсатишга ҳаракат қилишди. Имкониятларни яратиш, голлар уриш, ҳимояланиш, барчаси яхши даражада бўлди. Аммо АГМК билан ўйин бошқача бўлиши мумкин. Чунки бу кучлироқ рақиб. Демак, ўйин ҳам шунга яраша бўлади.

Матнда хатолик топсангиз, ўша хатони белгилаб, бизга жўнатинг (Ctrl + Enter)

Минбар

Барча блоглар