“Пиза” ва “Верона” А Сериядан тушиб кетди

Италия А Сериясининг 35-туридан сўнг “Пиза” ва “Верона” жамоалари элитани тарк этди.

“Пиза” ўз майдонида “Лечче”га 1:2 ҳисобида мағлуб бўлди ва 17-ўринга чиқиш имкониятини йўқотди. Шу тариқа, жамоа келаси мавсумни Серия Бда ўтказади. Эслатиб ўтамиз, “Пиза” 1990/91 мавсумидан кейин илк бор А Серияга қайтганди, аммо узоқ қола олмади.

“Лечче”нинг ғалабаси “Верона”га ҳам салбий таъсир қилди — жамоа ҳам турнир жадвалида қолиб кетиш имкониятидан маҳрум бўлди. Вероналиклар 2019 йилдан бери А Серияда иштирок этиб келаётганди.

Маълумот учун, А Серияда ҳар мавсум якунида сўнгги уч ўринни эгаллаган жамоалар қуйи лигага тушиб кетади.