Про лигадан Суперлигага "Турон" билан "Андижон" чиқади! Негалигини биласизми?

Яйпаннинг “Турон” клуби айни дамда про лигада якка пешқадамлик қилмоқда. Уларнинг мақсадини биласиз, яна Суперлигага қайтиш. Бу борада таркиб ҳам шунга яраша шакллантирилган. Аммо мураббийлар ҳозирда ихтиёридаги барча ўйинчилардан фойдалана олмаяпти.

Масалан, 28 ёшли ярим ҳимоячи Дониёр Исмоилов жамоа ўйинларида кўриниш бермай қўйди. Натижада мухлисларда турли саволлар пайдо бўлди. Бу йил ҳисобидан у фақат иккита учрашувдагина майдонга тушди холос. “Ғиждувон” ҳамда “Зомин” билан ўтказилган баҳсларда Дониёр захирадан ўйинга қўшилди. Sports.uz мухбири эса Исмоилов билан боғланди.

“Жароҳат олгандим, энди умумий машғулотларга қўшилдим”

- Йилнинг бошида бироз жароҳатим бор эди. Чемпионат бошланмасидан аввал шундай бўлиб қолганди. Албатта, даволандим. Аслида майдонга қайтгандим ва иккита учрашувда “Турон” сафида ўйнадим. Афсуски, ўша иккита учрашувдан кейин яна жароҳат олдим. Шунинг учун бир қатор беллашувларни ўтказиб юборишимга тўғри келди. Ўтган вақт давомида муолажа олдим. Мана, энди кечадан умумий гуруҳ билан машғулотларда қатнашишни бошладим. Аста-секин тикланиб боряпман. Худога шукр, операция бўлмадим. Даволаниш жараёнини муолажалар билан ўтказдим.

“Бошқа таклифларга қарамадим”

- Бу йилги мавсумни яна “Турон” клубида бошладим. Клубда қолиш ўзимнинг қарорим эди ва бундан ташқари жамоа билан амалда яна бир йилга мўлжалланган шартномам мавжуд эди. “Турон”даги яратилган шароитлар қониқтиргани учун фаолиятимни шу клубда давом эттиришга қарор қилдим. Бошқа таклифларга қарамадим. Шу ерда ҳам ҳаммаси яхшироқ.

“Про лига мусобақаси ижобий томонга ўзгариб кетди”

- Бу йилги про лиганинг плюс жиҳатлари кўпроқ. Чемпионат савияси анча ўсди, буни ўзингиз ҳам биласиз. Йилдан-йилга мавқеи кўтариляпти. Айниқса, про лига учрашувлари “Futbol TV” телеканалида жонли равишда эфирга узатилишни бошлагач, унга бўлган қизиқиш ҳам, савияси ҳам ортиб кетди. Шунинг учун ўйлайманки, бу мусобақада ҳаммаси ижобий томонга ўзгариб кетди. Борган сари Суперлига даражасига етиб қоляпти, ўртада озгина фарқ қоляпти холос.

“Ўтган йилгидан қизиқарлироқ”

- Про лигада интриганинг ошишига яна бир сабаблардан бири Суперлигага чиқиш учун курашаётган клубларнинг ортганлигидир. Ўз олдига элитага қайтиш вазифасини қўйган жамоалар курашга жиддий киришишган. Мақсади бор клублар кўпроқ. Шунинг эвазига про лига ўтган йилгидан ҳам қизиқарлироқ ўтяпти. Турнир жадвалини ҳам кўриб турибсиз, юқори ўринлардаги клубларни очколари деярли тенг ва бир-бирига яқин. Ҳеч кимни бефарқ қолдирмаяпти.

“Турон” кучлироқ”

- “Турон” жамоасини бошқалардан кучлироқ деб ўйлайман. Жисмоний томондан ҳам яхшироқ. Лекин рақобат жуда юқори. Суперлигага чиқиш учун интилаётган жамоалар кўпроқ. “Машъал”, “Андижон”, “Бухоро” сингари клублар биз учун тўғридан-тўғри асосий рақобатчиларимиз.

“Бунақанги ишқибозларга Суперлига ярашади”

- Суперлигага ким чиқади? “Турон” билан бирга “Андижон” элитага қайтади деб ўйлайман. Ўтган йили ўзим ҳам “Андижон” жамоасида ўйнаганман. Шунинг учун бу клубни яхши биламан. Ажойиб жамоа. Мухлислари ҳам жонкуяр. Бунақанги ишқибозларга фақат Суперлига ярашади. Ўз жамоасини кучлилар орасида қўллаб-қувватлашга муносиб. Балки “Бухоро” ҳам қўшилиб қолар. Умуман, барчаси яхши клублар. Муҳими, ҳаммасини мақсади бор.

“Ҳар доим жамоамга ёрдам бергим келади”

- Майдон четида ўйинларни кузатиш қийин. Жамоадошларимга ёрдам бергим келади. Аммо жароҳат билан ўйнаса, кейинчалик ундан-да ёмон оқибатларга олиб келиши турган гап. Тезроқ спорт формамга қайтиб, “Турон”га ёрдам беришга ҳаракат қиламан. Ҳар бир учрашувни кўрган пайтимда жамоамга ёрдам бергим келаверади. Фақат ҳозир бироз сабр қилиб туришимга тўғри келяпти. “Турон”да менга ҳаммаси қулай, ўз уйимдек бўлиб қолган. Шу боис жамоани ўзгартириш ниятим ҳам йўқ. Ҳамма нарса ёқади. Худо хоҳласа, бу йил мухлисларимизни хурсанд қилиб, “Турон” билан чемпионликни қўлга киритган ҳолда Суперлигага қайтмоқчимиз. Барча клубларга омад тилайман.