PSJ “Arsenal” forvardini oladigan bo‘ldi

Evropa Chempionlar ligasining amaldagi g‘olibi va Fransiyaning eng badavlat klubi “Pari Sen-Jermen” yozda hujum chizig‘ini kuchaytiradigan forvard olishni maqsad qilgan.

Parijliklar sport direktori Luish Kampush an shu masalada Londonning “Arsenal” klubi hujumchisi Gabriél Martinelli vakillari bilan uchrashuv o‘tkazdi.

PSJ o‘z yetakchi futbolchilarini saqlab qolishga intilsa-da, yozda tarkibni kuchaytirish uchun yangi o‘yinchilarni ham ko‘rib chiqmoqda, deb xabar beradi Get French Football News.

Parij klubi rahbariyati yaqin transfer oynasida Martinellini sotib olishni rejalashtirmoqda. 24 yoshli braziliyalik futbolchi 2019 yilning yozidan beri London jamoasida o‘ynab keladi.

Transfermarkt ma’lumotiga ko‘ra, uning bozor qiymati  45 million yevroga baholanyapti. Futbolchining “Arsenal” bilan shartnomasi 2027 yilning iyun oyi oxirigacha amal qiladi.