PSJdan ketmasam bo‘lmaydi!

PSJning asosiy darvozaboni Keylor Navas yozda klubni tark etishni mo‘ljallayapti. Kosta-rikalik posbon klub rahbariyati Maurisio Pochettino o‘rniga yangi murabbiy olib kelsa, u kelasi mavsum Janluiji Donnarummani birinchi raqam egasiga aylantirishidan xavotirlanmoqda.

Hozir Lionel Messi va Neymar boshchiligidagi janubiy amerikaliklar Navasni qo‘llab-quvvatlayapti. Buning ortidan Pochettino ko‘proq Keylorga ishonch bildirishga majbur bo‘lyapti.

35 yoshli Navas kelajakda ham muntazam o‘yin amaliyotiga ega bo‘lish uchun boshqa klubga o‘tishni rejalashtirmoqda. Hozirning o‘zida unga Italiya grandlari – “Milan”, “Roma” va “Yuventus” jiddiy qiziqish bildirmoqda.

Navasning parijliklar bilan amaldagi shartnomasi yana ikki yarim yil davom etadi. Shunday ekan, uni transfer qilmoqchi bo‘layotgan klublar badal puli to‘lashiga to‘g‘ri keladi.