Қийин ғалаба Ўзбекистонни нечанчи ўринга олиб чиқди?

Венгриянинг Будапешт шаҳри мезбонлик қилаётган шахмат оламининг энг нуфузли мусобақаси ҳисобланган 45-Бутунжаҳон шахмат Олимпиадасида Ўзбекистон эркаклар ва хотин-қизлар терма жамоалари муваффақиятли иштирок этмоқда.

Бутун дунёдан 200 га яқин давлат терма жамоалар эркаклар ва хотин-қизлар ўртасидаги беллашувларда ғолиблик учун куч синашяпти. Олимпиада иштирокчиларининг умумий сони 630 нафар спортчини ташкил қилмоқда. Улардан 246 нафар гроссмейстерлардир.

Шахмат бўйича Ўзбекистон эркаклар терма жамоаси саккизинчи турда Сербия вакиллари билан тўқнаш келиб, 2,5:1,5 ҳисобида жуда қийин ғалабага эришди.

Тўртта тахтадаги баҳслардан учтасида кучлар тенг келди. Гроссмейстерларимиздан Нодирбек Ёқуббоев, Жавоҳир Синдоров ва Шамсиддин Воҳидов мос равишда рақиблари Алексек Сарана, Александар Инджич, Велимир Ивич билан очко бўлишди.

Биринчи тахтада ўйнаган Нодирбек Абдусатторов Александр Предкени мот қилиб, умумий ҳисобдаги ғалабани Ўзбекистон томонига бурди.

Бу ғалабадан кейин шахматчиларимиз умумжамоалар ҳисобида иккинчи ўринга кўтарилиб олди. Кейинги ўйин биринчи ўринда бораётган Ҳиндистон терма жамоасига қарши ўтказилади.

Хотин-қизлар мусобақасида шахматчи қизларимиз фаворитлардан бири – АҚШ терма жамоасига қарши дона сурди.

Эътиборли жиҳати, америкаликлар сафида биринчи тахтада ўйнаб келган ўзбек қизи Гулруҳ Тоҳиржонова терма жамоамизга қарши дона сурмади. Унинг ўрнини Карисса Йип эгаллади.

Бу баҳсда шахматимиз маликалари мағлубиятни тан олишига тўғри келди. Афруза Ҳамдамова Карисса Йипга, Нилуфар Ёқуббоева Ирина Крушга, Умида Омонова Алисе Лига имкониятни бор берди.

Нодира Нодиржонова Анна Затониский билан дуранг ўйнади. Умумий ҳисоб АҚШ фойдасига –  0,5-3,5.

Мағлубиятдан кейин терма жамоамиз қизлари мусобақа жадвалида 25-поғонага тушиб кетди. Энди улар навбатдаги турда сербиялик шахматчиларга қарши дона суради.

Эслатиб ўтамиз, мусобақа қоидасига кўра, ҳар бир терма жамоа беш нафар шахматчилан таркиб топади. Ҳар турда улардан тўрт нафари дона суради ва биттаси захира ўйинчиси вазифасини бажаради. Мусобақа швейцарча тизимда 11 раунддан иборат бўлади.  

Вақт назорати 40 та юриш учун 90 дақиқа, ўйин тугашигача 30 дақиқа қўшилади, ҳар бир юриш учун биринчисидан бошлаб +30 сония берилади.