Қозоғистондаги легионеримиз: "Катта эҳтимол билан қоламан"

2024 йилни Қозоғистоннинг “Қайсар” клубида ўтказган ҳамюртимиз Шохназар Норбеков у ерда ўзидан яхши таассурот қолдирди.

30 ёшли ярим ҳимоячи “Қайсар” сафида бу йил учта мусобақада жами 26 та ўйинда майдонга тушди. 1 та гол урди ва 4 та голли пасни берди.

Ҳозирда қишки таътилда бўлиб турган футболчи Sports.uz учун интервью берди.

- Шохназар, аввало якунига етган 2024 йил сиз учун қандай ўтдия? Дастлаб шу ҳақида тўхталиб ўтсангиз?

- Барчани янги 2025 йил билан табриклайман. Мавсумни яхши ўтказдик. Ёмон бўлмади. Барибир бу янги чемпионат, янги муҳит. Шунинг учун бўлса керак, бошида бироз қийналдим. Кейин анча ўрганиб қолдим. Яхши, Қозоғистонда ўйнаганимдан кўнглим тўлди.

- Виктор Кумиков бошчилигида "Қайсар" шарафини ҳимоя қилдингиз. Олдин ушбу мураббий билан бирга ишлагансиз. Балютович сизга кўпроқ нимаси билан ёқади?

- Олдинги Балютович билан ҳозирги Балютовични катта фарқи бор. Аввал бироз “агрессив” эди. Бошқача йўналиш билан ишларди. Ҳозир эса бошқача инсон ва бошқача мураббийга айланди. Лекин майдондаги талаби ўша-ўша. У нимаси билан ёқади? Энг асосийси, Кумиков ҳаққоний инсон. Нима бўлса ҳам ўзи келиб юзингизга айтади.  

- "Қайсар" олдига қўйилган вазифани қанчалик бажарди?

- Яхши дейиш мумкин. Бундан яхшироғини ҳам бажарсак бўларди. “Қайсар” бюджет томонлама ўртамиёна жамоа. Агар бюджети янада яхшироқ бўлганида шу таркиб билан учталикка кирсак бўларди. Чунки биринчи даврадан кейин имкониятимиз ҳам бор эди ва яхшигина очко жамғариб қўйгандик. Иккинчи даврада яна бироз қўллаб-қувватлов бўлганида мавсумни кучли учталикда якунлаган бўлардик.  

- Клуб билан тузган шартномангиз якунланди. Кейинги режангиз қандай? "Қайсар"да қолмоқчимисиз ёки...

- Ҳозирча аниқ эмас. 7 январда йиғин бошланади ва у ерга бораман. Бу иш билан шуғулланадиган одамлар бор. Ҳозирча “Қайсар”даман.

- Қозоғистон чемпионатида сиздан ташқари Йўлдошев, Яхшибоев, Умаров каби легионерларимиз ҳам тўп суришди. Улар билан гаплашиб турдингизми? Умуман, қозоғистонлик мухлисларнинг легионерларимизга муносабати қандай?

- Ўйинлар пайтида кўришиб, гаплашиб турдик. Умаров билан анчадан бери қалинмиз. Чимкентда 10 кун йиғин ўтказгандик. Ўша 10 кун мобайнида Умаров билан бирга бўлдик. Жасур билан салом-алигимиз бор. Иброҳимхалил билан ҳам ўйинлар чоғида кўришиб турдик. Шаҳбоз Умаровни Олмалиқда ўзим катта қилганман. Легионерларга муносабат зўр. У ерда легионерлар учун лимит йўқ. Қозоғистон билан Ўзбекистон менталитети деярли бир хил. Одамларини дунёқариши ҳам бир хил. Бу борада муаммо бўлмайди. Балки Европа ёки бошқа жойдан легионерлар келса қийинроқ бўлиши мумкин. Маҳаллий йигитлар билан ҳам яхши киришиб кетдик. Мухлисларни ҳам муносабати зўр.

- Умуман олганда, сизга қандай вариантлар тушмоқда?

- Ҳали ҳеч ким билан гаплашганим йўқ. Бир-иккита дўстларим қўнғироқ қилиб нима қиласиз, деб сўраб туришди. Аммо клублардан ҳали расмий таклиф бўлмади. Катта эҳтимол билан Қозоғистонда қоламан. Келишимдан аввал Виктор Кумиков қоласанми деганида, қоламан деб жавоб бергандим.

Шуҳратбек Жўраев.