Қувондиқ Рўзиев: Купер профессионаллик бўйича маҳаллий мураббийларга ўрнак бўла оларди

Коронавирус касаллиги кенг тарқалаётгани туфайли юзага келган карантин вақтида "Қўқон-1912" ярим ҳимоячиси Қувондиқ Рўзиев интервью берди. Бу ҳақда, "Сурхон" клубининг матбуот хизмати хабар берди. Ушбу футболчи билан бўлиб ўтган суҳбатни эътиборингизга ҳавола этамиз.

- Нега бу йили "Сурхон" жамоаси таклифини рад этдингиз?

- "Сурхон" жамоаси таклифини рад этганим йўқ. Ўтган йилги чемпионат тугашидан олдин "Сурхон" жамоаси мураббийи мен билан алоқага чиққанда тушунтирдим хориж клубларидан таклиф бўлаётганини ва ўзимни ҳам хорижда ўйнаш ниятим борлигимни айтдим. Шундан сўнг, мен билан бошқа алоқага чиқишгани йўқ.

- Олинган маълумотларга қараганда, сизга Жанубий Корея клуби жиддий қизиқиш билдирган. Нега ушбу трансфер амалга ошмади?

- Ҳа, хориж клубларининг 2-3 тасидан таклифлар бор эди. Кореядан ташқари, яна бошқа давлатлардан ҳам таклиф бор эди. Ўзим ҳам кетишни ният қилиб тургандим. Ростини айтадиган бўлсам, "Қўқон-1912" янги бош мураббий бўлган Бахтиёр Ашурматов менга ҳеч бўлмаса ярим йил "Қўқон"га ёрдам беришим кераклигини айтди ва мен ҳам шу жамоада 2-3 йилдан бери меҳнат қилиб келаётганлигим учун йўқ, дея олмадим. Лекин ҳали ҳам фикримдан қайтганим йўқ, ўзимни хориж клубларида синаб кўриш ниятим бор.

- Сизни футболдаги илк мураббийингиз ким?

Футболдаги биринчи мураббийим эмас, ёшлигимдан менга футбол сирларини ўргатган мураббийим Рустам ака Орипов бўладилар. Айнан шу инсон нафақат футболда балки ҳаётда ҳам менга кўп нарсаларни ўргатган. Рустам ака мендан ташқари Икром Алибоев, Хуршид Мухторов, Дониёр Усмонов ва Тимур Усмоновга ҳам устоз ҳисобланади.

- "Сурхон" жамоаси ўйинларини кузатиб борасизми?

-"Сурхон" жамоаси ўйинларини имкон қадар кузатиб боришга ҳаракат қиламан. Агар вақт бўлиб, машғулотларга тўғри келиб қолмаса, ўйин кунига тўғри келиб қолмаса, албатта, ўйинини кўраман.

- Эктор Купер ҳақида фикрларингиз? Купернинг маҳаллий мураббийлардан фарқли жиҳати нимада?

- Купер биринчи навбатда ажойиб инсон эди. Ҳақиқий профессионал мураббий. У билан майдондан ташқарида ҳохлаганча ҳазил қиласиз. Муаммоларингизни айтсангиз имкон қадар биргаликда ҳал қилар эди. Лекин майдонда ва машғулотларда ҳақиқий қаттиқ қўл мураббий. Куперни маҳаллий мураббийлар билан солиштирмаган бўлардим. Ҳар бир мураббийнинг ўзига яраша устун жиҳатлари бор. Купер профессионаллик жиҳатидан маҳаллий мураббийларга ўрнак бўла оларди. Купер - бир сўзни доим такрорларди: "терма жамоа эшиклари ҳамма учун очиқдир". Ким ўзини яхши томонлама кўрсатса, мен уни албатта терма жамоага чақираман, дерди. Шу жиҳатлари билан ажралиб турарди, десам ҳам бўлади.

- "Сурхон" жамоасига қайтиш ниятингиз борми?

Сурхондарё ўзим туғилиб ўсган жой. Албатта бу вилоят шаънини ҳимоя қилиш мен учун шарафдир! Худо ҳохласа ҳали албатта қайтиш ниятим бор. Фақат боя юқорида айтганимдек, ҳозирги асосий мақсадим ўзимни хориж жамоаларида синаб кўриш ёки ўз олдига юқори мақсадларни қўйган (ОЧЛ) жамоаларда ўйнаш.

- Футболдаги энг яқин дўстингиз ким?

Футболдаги дўстларим жудаям кўп. Энг яқин дўстим Икром Алибоев. У билан ёшлигимдан бирга катта бўлганмиз. Икром билан 12-13 йилдан бери биргамиз. Ундан ташқари, Хуршид Мухторов, Сарвар Каримов билан ёшлигимдан дўстман.

- Қайси футболчининг ўйинлари сизга ёқади?

- Асосан битта футболчини айтмаган бўлардим. Лекин кўпроқ "Ливерпуль" собиқ ярим ҳимоячиси Коутиньони ўйинларини доимий кузатиб бораман.

- Қайси жамоага мухлислик қиласиз?

- Ёшлигимдан футболга кириб келиб, футболни таниганимдан бери Италиянинг "Милан" жамоасига мухлислик қиламан. Ушбу жамоа менинг футболга кириб келишимга меҳр уйғотган, десам ҳам адашмаган бўламан. Ҳозиргача ҳам айнан "Милан"га мухлислик қиламан.

- Футболчи бўлиш учун пули бўлиши керак, деган фикрларни эшитамиз. Сиз бунга қандай жавоб берасиз?

Бу фикрга мутлақо қўшилмаган бўлардим. Нафақат футболда балки ҳаётда ҳам шунақанги вазиятлар бўладики "пул" ҳеч нарсани ҳал қилмай қолади. Бу шунчаки оддий маҳаллий одамлар орасидаги гаплар. Лекин футболчи бўлиб ёки футбол ичида яшаган инсон учун бу шунчаки кулгили гап туйилади. Тўғри, баъзида бўлиши мумкин, масалан ёшлигида ўғли бошқа нарсага қизиқса ҳам уни мажбурлаб футболга қўйиб, мураббий билан яхши бўлиб, унга 1-2 сўм пул бериб, ўғлини ўйнатса бўлар. Бу фақат ёшлигида шу ишларни қилишингиз мумкин. Лекин бу нарса 15-16 ёшга тўлганда автоматик тарзда ўз сўзини айтади. Ўша боланинг футболчи бўлиб етишиши 90% дан 10% бўлиб қолади. Шунинг учун биринчи навбатда инсонда характер бўлиши керак. Умуман, ҳаётда ҳам характер бўлмаса бирор нимага эришиш қийин. Бу гапларим ҳозир оддий гапга айланиб қолган. Юқорида айтганимдек, футбол ичида бўлган одам учун футбол умуман бошқача нарса.

Баъзида ўша болани ўзи ёки отаси тан олгиси келмайди. Мисол учун ўғлини бирор клубга олиб борди, кучи етмади, тортолмади. Кейин нима дейди? Дўстларига ёки яқин қариндошларига "мени ўғлим футболга тортмас экан, мени ўғлимдан ҳам яхшилар бор экан", деган фикрни айтадиган 100 та одамдан битта чиқади. Кейин ўша бола нима биз билан борган 3-4 таси таниш билан кириб кетди, мендан шунча пул сўради, шу сабабли футболдан кетдим, футболни йиғиштирдим, ҳамма ёқ пул бўлиб ётибди деган гаплар айтилади. Шу сабабли мана шу гаплар келиб чиққан, деб ўйлайман. Таниш-билиш, пул - бу умуман бўлмаган нарса. Футболда умуман йўқ нарса. Чунки жаҳон тажрибасида ҳам асосан юлдуз ўйинчилар қийинчиликда катта бўлган ўйинчилар ҳисобланади. Характер эвазига ғолиб чиққан ўйинчилар улар. Мисол тариқасида Бразилияни келтириш мумкин. Футболчилари асосан кўчада катта бўляпти ва қизиғи улар кейинчалик юлдуз футболчиларга айланаяпти. Нимани эвазига - қийинчилик ва характер эвазига. Шундай экан пули бўлиши керак деган фикрлар мутлақо нотоғридир.