Ракитич қишда "Ювентус"нинг таклифини рад этган

"Барселона" клуби ярим ҳимоячиси Иван Ракитич қишки трансферлар даврида "Ювентус"дан бўлган ажойиб таклифни рад этгани маълум бўлди.

Marca нашри тарқатган хабарга кўра “кекса синьора” давралар оралиғидаги музокаралар давомида 32 ёшли хорватиялик футболчи учун каталонияликларга 42 млн евро таклиф қилишган. Ушбу таклиф “Барса” раҳбариятини тўла қониқтирган. Бироқ, Ракитич Туринга кетишни хоҳламаган.

Эслатиб ўтамиз, бундан аввалроқ Ракитич ёзда ўзининг собиқ жамоаси ҳисобланган “Севилья”га ўтмоқчи экани ҳақида хабарлар тарқалган эди.