Рамос дунё футболида ўчмас из қолдиришга жуда яқин турибди

Испания терма жамоаси ва “Реал” Мадрид клуби сардори Серхио Рамос кеча “ЖЧ-2022” Европа минтақаси саралашининг 3-туридан ўрин олган Косовога (3:1) қарши ўйинда иштирок этди.

Бу 35 ёшли футболчи учун терма жамоа сафидаги 180-ўйин бўлди. Шу тариқа, у футбол тарихида терма жамоада энг кўп ўйин ўтказган футболчилар рейтингида 3-ўринга кўтарилиб олди. У бу борада ўмонлик Аҳмад Муборакни ортда қолдирди.

Ҳозирча Рамосдан юқорида фақатгина Бадр ал-Мутава (Қувайт, 181 та ўйин) ҳамда Аҳмад Ҳассан (Миср 184 та ўйин) бор.

Маълумот учун, Серхио Рамос Испания терма жамоаси сафида 2005 йилдан буён тўп суриб келмоқда.