Рангник: Погба кетса, кетаверсин!

“Манчестер Юнайтед”ни қабул қилиб олган Ральф Рангник жамоа юлдузи Поль Погба клубдан кетишни истаса, унга тўсқинлик қилмаслигини билдирди.

Жароҳатидан тикланиш арафасида турган франциялик футболчи мавсум якунида эркин агентга айланади. Клуб раҳбарияти бу ярим ҳимоячини янги битим имзолашга кўндира олгани йўқ.

Январда Погба ўзи истаган жамоалар билан музокара ўтказиши ва дастлабки келишувни имзолаши мумкин бўлади.

Рангник 28 ёшли шогирдининг бу ишларига аралашмаслигини маълум қилди.

- Мен у ушлаб қолишга арзимайди, деган фикрдан йироқман. Лекин ўйинчилар “Манчестер Юнайтед”дек катта клубларда ўз ихтиёри билан ўйнаши керак. Агар футболчининг ўзи “Манчестер Юнайтед”да тўп тепишни истамаса, уни кўндиришдан маъно йўқ.

Погба даволансин, тиклансин, машғулотларга қайтсин, уёғи нима бўлишини кейин кўрамиз, мен фақатгина уни шуғуллантирмайман. Қўл остимдаги ҳар бир футболчини янада яхшироқ даражага олиб чиқиш учун қўлимдан келганини қиламан, - деди Ральф Рангник.