Raqibiga elka solib, qo‘rqitib qo‘ygan Husanovning o‘yini qanday baholandi?
Frantsiya chempionatining to‘qqizinchi turiga kelib, “Lans” birinchi mag‘lubiyatini qabul qilib oldi.
O‘z muxlislari ko‘z o‘ngida “Lill” bilan to‘qnashgan lansliklar navbatdagi durangga yaqin edi. Lekin to‘xtalishlar uchun qo‘shib berilgan 8-daqiqada “Lill” penaltidan hisobni ochdi. Yana ikki daqiqadan keyin ikkinchi golni ham urdi.
“Lans” faoliyatini yoritib kelayotgan lensois.com portali eksperti Klement Kurtua futbolchilar harakatini quyidagicha baholadi.
Ishonchni oqlaganlar:
Abduqodir Husanov
O‘zbek futbolchisi ilk daqiqalardan raqib hujumchisi Edon Jerovaga elka bilan zarba berib, jarima maydonchasi atrofida kim xo‘jayin ekanini ko‘rsatib qo‘ydi. Bu gal chap qanotdan joy olgan Husanov avvalgi o‘yinlardagi tempini saqlab qoldi.
Bellashuv davomida uch marotaba raqib uzatgan to‘pni egallab oldi, to‘rt marotaba yakkakurashlarda g‘olib chiqdi. Juda faol o‘ynagan 20 yoshli futbolchi himoya chizig‘ining har bir nuqtasida ishonchli o‘ynay olishini ko‘rsatdi.
Jonatan Gradit
O‘ng qanot himoyachisi juda yaxshi o‘ynadi. Jamoasini xavfli vaziyatlardan qutqardi. Himoyalanish bilan birga tezkor qarshi hujum ubshtirishga ham harakat qildi. O‘yini ko‘pchilikka manzur bo‘ldi.
Anas Zaruri va Fakundo Medina
Bu ikki futbolchi o‘zlari uchun yangi pozitsiyada harakat qilganiga qaramay, yaxshi saviyada o‘ynadi. Zaruri “Lans”ning eng o‘tkir hujumlarini tashkil qilish barobarida himoyalanishda ham o‘zini ko‘rsata oldi.
Asosan himoyada o‘ynab kelgan Medinaga bu gal maydon markaziga yaqinroq joyni egallash topshirildi. O‘zi qatnashgan yakkakurashlarda ustunlikka ega bo‘lgan argentinalik futbolchi “Lill”ning bir qator hujumlarini barbod qilishni uddaladi.
Ishonchni oqlamaganlar:
Adrien Tomasson
Adrien o‘yinning o‘rtalariga borib, ancha toliq qoldi. Buning oqibatida raqibga etarli darajada qarshilik ko‘rsatolmadi. Yakkakurashlarda imkoniyatni boy bergan yarim himoyachi hujum uyushtirilgan vaziyatlarda ham juda bo‘sh o‘ynadi.
Florian Sotoka
Bu futbolchi juda ko‘p energiya sarfladi. Ko‘p yugurgan bo‘lsa-da, harakatlari samarasiz ketdi. Bir necha marta darvozani ishg‘ol qilish uchun yaxshi imkoniyatga ega bo‘ldi. Lekin o‘zini ko‘rsata olmadi.
Mbala Nzola
“Lill” himoyachini Nzolaga qarshi kurashishda ancha qiynaldi. Lekin angolalik futbolchi ham hujumdagi sheriklari singari darvozaga hal qiluvchi zarbani berishda bo‘shlik qildi.
Kevin Danso
Uchrashuv taqdirini raqib foydasiga hal qilgan penaltining aybdori aynan Kevin Danso bo‘ldi.
Fayzullaev katta gapirib yubordi!
Shomurodov bilan yuzaga kelgan vaziyat hammaning e’tiborini tortdi
Husanovni yanvarda olib ketishmoqchi. Legionerimiz faoliyatini qaerda davom ettiradi?
Legionerimiz o‘yindan chiqib ketganidan keyin jamoasi qahramonlik ko‘rsatdi
Fikrlar