Расман! "Динамо" ўзининг энг яхши футболчисини ортга қайтарди

«Динамо» раҳбарияти Беларусь чемпионати етакчиларидан бири ҳисобланган «Энергетик-БГУ» билан ўзбекистонлик ярим ҳимоячи Шоҳрух Абдураҳмоновни ярим йиллик ижарага олиш борасида келишувга эришди. Бу ҳақда клуб матбуот хизмати хабар тарқатмоқда.

Ўз навбатида 23 ёшли футболчи ҳам Самарқандга қайтиб, "Динамо"га мавсумнинг иккинчи қисмида ёрдам беришга қарор қилган. Клуб ва Шоҳрух Абдураҳмонов ўртасида мавсум якунига қадар шартнома имзоланди ва у бугун, 29 июль кунидан «Динамо»нинг Тошкентдаги йиғинига қўшилди.

2019 йил «Динамо» сафида 19 ёшида Суперлигада дебют қилган Шоҳрух Абдураҳмонов уч йил давомида самарқандликлар шарафини муносиб ҳимоя қилиб, 2021 йил клубнинг Про лигадан элитага қайтишига катта ҳисса қўшиб, мавсум якунида мухлислар томонидан «Динамо»нинг 2021 йилги энг яхши ўйинчиси» деб топилганди. Шундан сўнг у легионер бўлишга қарор қилиб, «Энергетик-БГУ» сафига ўтганди.

Маълумот учун, Абдураҳмонов жорий мавсум «Энергетик-БГУ» сафида Беларусь чемпионатида барча 13 ўйинда майдонга тушиб, 1 та гол ва 4та ассистга муаллифлик қилган.

Фикрлар

Фикр қолдириш учун авторизациядан ўтинг!