Расман! ФИФА 2026 йилги мундиал форматини тасдиқлади. Энди гуруҳда 3-ўринни эгаллаган жамоа ҳам плей-оффда иштирок этиши мумкин бўлади!

ФИФА кенгаши 2026 йилдан бошлаб жаҳон чемпионатининг янги форматини тасдиқлади. Бу ҳақда ташкилот расмий сайти хабар бермоқда.

Руанда пойтахти Кигали шаҳрида бўлиб ўтган ФИФА конгрессида 2026 йилги жаҳон чемпионати формати тасдиқланди, унда илк бор 48 та жамоа иштирок этади.

Дастлаб 48 нафар иштирокчи терма жамоа 3 тадан жамоадан иборат 16 та гуруҳга бўлинишни режалаштирган эди. ФИФА бу ғоядан воз кечиб, ҳар бирида 4 та жамоа бўлган 12 та гуруҳли форматни танлади.

Унга кўра, 12 та гуруҳда 1- ва 2-ўринни эгаллаган жамоалар, шунингдек гуруҳларда энг яхши натижа қайд этган 8 та 3-ўрин соҳиблари ҳам 1/16 финал босқичига йўлланма олади.

Океан ортидаги жаҳон чемпионатида жами 104 та ўйин ўтказилади. Турнир 39 кун давом этади.

Эслатиб ўтамиз, 2026 йилги жаҳон чемпионати АҚШ, Канада ва Мексикада бўлиб ўтади.